వాషింగ్టన్: కమలా హ్యారిస్.. అమెరికాకు కాబోయే వైస్ ప్రెసిడెంట్. భారత సంతతికి చెందిన ఆమె అమెరికాకు మొట్టమొదటి మహిళా వైస్ప్రెసిడెంట్ కానున్నారు. అంతేకాదు అమెరికాలో నల్లజాతికి చెందిన మహిళ ఈ పదవి చేపట్టడం ఇదే తొలిసారి. రైట్స్ యాక్టివిస్ట్గా ఉండి రాజకీయాల్లోకి వచ్చిన కమల.. మొదట కాలిఫోర్నియా అటార్నీ జనరల్గా పనిచేశారు. ప్రస్తుతం కాలిఫోర్నియా సెనేటర్గా ఉన్నారు. అసలు నేరుగా డెమొక్రటిక్పార్టీ ప్రెసిడెన్షియల్ క్యాండిడేట్గా పోటీ పడిన ఆమె.. జో బైడెన్కు పార్టీలో మద్దతు రావడంతో రేసు తప్పుకున్నారు. అయితే ఆమెకు ప్రజల్లో, పార్టీలో ఉన్న ఫాలోయింగ్ తో బైడెన్ ఆమెను వైస్ ప్రెసిడెంట్ క్యాండిడేట్గా ఎంపిక చేశారు.
తల్లి ఇండియన్.. తండ్రి జమైకన్
కమల తల్లి శ్యామలా గోపాలన్ ఇండియన్. తమిళనాడులోని చెన్నైలో పుట్టిన ఆమె.. హయ్యర్ ఎడ్యుకేషన్ కోసం 1958లోనే అమెరికా వెళ్లి అక్కడే స్థిరపడ్డారు. కేన్సర్ పరిశోధకురాలిగా పనిచేస్తూనే పౌర హక్కుల కోసం ఉద్యమాల్లో పాల్గొన్నారు. ఇక కమల తండ్రి డొనాల్డ్ హారిస్ జమైకా దేశానికి చెందినవారు. స్టాన్ఫర్డ్ యూనివర్సిటీలో ఎకానమిక్స్ ప్రొఫెసర్. కమలకు మాయ అనే చెల్లెలు ఉంది. అయితే కమలకు ఐదేండ్ల వయసు ఉన్నప్పుడే తల్లిదండ్రులు విడిపోయారు. కమలా హారిస్ 2014లో డగ్లస్ ఎమోఫ్ అనే యూదు లాయర్ను పెండ్లి చేసుకున్నారు. భారతీయ, యూదు సంప్రదాయలను అనుసరిస్తూ తమ వివాహం జరిగిందని ఆమె చెప్పారు.
హక్కుల పోరాటంతో మొదలుపెట్టి..
కమలా హారిస్ తల్లి శ్యామల రైట్స్ యాక్టివిస్ట్. 1960 టైంలోనే అమెరికాలో జరిగిన ఉద్యమాల్లో పాల్గొన్నారు. ఇది కమలపై చిన్నప్పటి నుంచే ప్రభావం చూపింది. ఈమె కూడా మహిళలు, నల్లజాతి వారి హక్కుల ఉద్యమాల్లో పాల్గొన్నారు. కాలిఫోర్నియా అటార్నీ జనరల్ పదవి చేపట్టిన తొలి మహిళ, తొలి ఇండియన్ అమెరికన్గా గుర్తింపు పొందారు. 2015లో ఆమె సెనేట్కు పోటీ చేసి.. కాలిఫోర్నియా సెనేటర్గా గెలిచారు. అమెరికాలో పుట్టిన కమలా హారిస్ తాను అమెరికన్నే అని తరచూ చెప్తుంటారు. అయినా అక్కడివారు ఆమెను నల్లజాతి లీడర్గానే చూస్తుంటారు. అమెరికాలో జాతి విద్వేషానికి వ్యతిరేకంగా ‘బ్లాక్ లైవ్స్ మ్యాటర్’ ఉద్యమం జోరందుకున్న నేపథ్యంలో ఈ గుర్తింపుకు ప్రాధాన్యత కూడా పెరిగింది. కమలా హారిస్ సోషల్ మీడియాలో యాక్టివ్గా ఉంటారు.
గొప్ప ఆత్మవిశ్వాసంతో..
అమెరికాలోని నల్లజాతి రాజకీయ నేతల్లో కమల చాలా ఫేమస్. అమెరికాలో రేసిస్ట్ భావజాలం ఉన్న పరిస్థితుల్లో కూడా.. ఆమె తన మూలాలను ఎప్పుడూ దాచుకోలేదు. పైగా గర్వంగా బయటికి వ్యక్తం చేస్తుంటారు. ఈ విషయాన్ని తన ఆత్మకథ ‘ది ట్రూత్స్ వి హోల్డ్’ బుక్లో పేర్కొన్నారు. తన పేరును ఎలా పలకాలో చెప్తూ.. తన ఆత్మ విశ్వాసాన్ని ప్రదర్శించారు. ‘‘నా పేరును కమలా అని పిలవాలి. పంక్చుయేషన్ కోసం ఉపయోగించే కామా ( , )ను పలికినట్టు పలకాలి. కమల అంటే తామర పువ్వు అని అర్థం. ఇండియన్ కల్చర్లో దానికి ప్రత్యేక స్థానం ఉంది. ఆ పువ్వు చెరువులో తేలియాడుతున్నట్టే కనిపిస్తుంది. కానీ దాని వేర్లు అడుగున బలంగా పాతుకుని ఉంటాయి’’ అని వివరించారు.
అమెరికాలో ఈ స్థాయికి వచ్చింది ముగ్గురే..
అమెరికాలో ఇప్పటివరకు ఒక్క మహిళ కూడా ప్రెసిడెంట్గా, వైస్ ప్రెసిడెంట్గా గెలవలేదు. నల్ల జాతి మహిళలకు అయితే ప్రెసిడెన్షియల్, వైస్ ప్రెసిడెన్షియల్ క్యాండిడేట్లుగా కూడా చాన్స్ రాలేదు. అసలు రాజకీయ పార్టీల నుంచి ఈ పదవుల కోసం పోటీ చాన్స్ వచ్చిన మహిళలు ముగ్గురే. వైస్ ప్రెసిడెంట్ పదవి కోసం.. 1984లో డెమొక్రటిక్ క్యాండిడేట్గా గెరాల్డైన్ ఫెరారో, 2008లో రిపబ్లికన్ పార్టీ క్యాండిడేట్గా సారా పాలిన్ పోటీ చేశారు. కానీ గెలవలేదు. ఇప్పుడు తొలిసారిగా కమలా హారిస్ గెలిచారు.
ఆమె పోరాట యోధురాలు
‘ఎలాంటి భయం లేకుండా పోరాటే యోధురాలు కమలా హారిస్. దేశంలోని ఉత్తమ ప్రజా సేవకుల్లో ఆమె ఒకరు’ అని వైస్ ప్రెసిడెంట్ క్యాండిడేట్గా ఎన్నుకున్నప్పుడు జో బైడెన్ ప్రకటించారు. మహిళలు, పిల్లలు, కార్మికుల హక్కుల కోసం పోరాడారని, ఆమెతో కలిసి పోటీ చేయడం గర్వంగా ఉందనీ పేర్కొన్నారు. మొదటి రోజు నుంచే ప్రభుత్వాన్ని సమర్థవంతంగా నడిపించగలిగే సత్తా ఉన్న వ్యక్తి అని మెచ్చుకున్నారు.