టాలీవుడ్ యంగ్ హీరో నిఖిల్, అనుపమ పరమేశ్వరన్ జంటగా నటించిన చిత్రం ‘కార్తికేయ 2’. చందు మొండేటి దర్శకత్వంలో వచ్చిన ఈ మూవీ సూపర్ హిట్ అయ్యింది. ఆగస్ట్ 13న తెలుగుతో పాటు హిందీ, తమిళ భాషల్లో విడుదలైన ఈ చిత్రం.. అన్ని చోట్లా విజయవంతంగా ప్రదర్శించబడుతోంది. అయితే ఈ చిత్రాన్ని మేకర్స్ ఓటీటీలో రిలీజ్ చేశారు. దసరా పండుగ రోజున ‘జీ5’ ఓటీటీలో విడుదలైన ఈ మూవీ ఇక్కడ కూడా దూసుకుపోతుంది. 48 గంటల్లో 100 కోట్ల నిమిషాలకు పైగా ఈ సినిమా స్ట్రీమింగ్ జరిగినట్లుగా జీ5 ఓటీటీ సంస్థ ట్విట్టర్ వేదికగా అధికారికంగా తెలియజేసింది.
పీపుల్స్ మీడియా ఫ్యాక్టరీ, అభిషేక్ అగ‌ర్వాల్ ఆర్ట్స్ సంయుక్తంగా నిర్మించిన ఈ సినిమాను బాలీవుడ్‌లోనూ ప్రేక్షకులు ఎంతో ఆదరించారు. ఇంకా ఈ సినిమా బాలీవుడ్‌లోని కొన్ని థియేటర్లలో విజయవంతంగా ప్రదర్శించబడుతోంది. అలాగే ఓవర్సీస్‌లో కూడా ఈ చిత్రం మంచి ఆదరణను సొంతం చేసుకుంది. ఇక ఫుల్‌ రన్‌లో ఈ చిత్రం దాదాపు రూ.120 కోట్ల వరకు కలెక్షన్‌లను రాబట్టి నిఖిల్ కెరీర్‌లోనే అత్యధిక కలెక్షన్‌లను సాధించిన సినిమాగా నిలిచింది. మరోవైపు ప్రస్తుతం కార్తికేయ 3 చిత్రానికి సంబంధించిన స్క్రిప్ట్‌ పనులు జరుగుతున్నాయని తెలుస్తోంది.
