హైదరాబాద్ సిటీ, వెలుగు: ఎంఎంసీ పరిధిలో అనుమతి లేకుండా ఏర్పాటు చేసిన హోర్డింగ్లు, ఫ్లెక్సీలపై కఠిన చర్యలు తీసుకుంటామని కమిషనర్ వినయ్ కృష్ణా రెడ్డి హెచ్చరించారు. శనివారం బోడుప్పల్లోని పలు కాలనీల్లో ఆయన పర్యటించారు. ట్రేడ్ లైసెన్స్ లేని దుకాణాలపై చర్యలు తీసుకోవాలని అధికారులను ఆదేశించారు. కేశవ్ నగర్, బృందావన్ కాలనీల్లోని ఖాళీ స్థలాల్లో భవన నిర్మాణ వ్యర్థాలు, చెత్త వేసిన ప్లాట్ యజమానులను గుర్తించి వెంటనే ఆ స్థలాలను శుభ్రం చేయించాలన్నారు.
అలాగే విద్యుత్ స్తంభాలు, గోడలపై ఉన్న ప్రకటన బోర్డులను తక్షణమే తొలగించాలని టౌన్ ప్లానింగ్ అధికారులను ఆదేశించారు. వీటితో పాటు బోడుప్పల్ పీహెచ్సీలోని పార్క్, ఓపెన్ జిమ్ పరికరాలకు రిపేర్లు చేయించాలని, అర్బన్ పార్క్ పనులను స్పీడప్ చేస్తూ అండర్గ్రౌండ్ డ్రైనేజ్ సమస్యలను వెంటనే పరిష్కరించాలని స్పష్టం చేశారు. చివరగా హనుమాన్ నగర్లో జరుగుతున్న సెన్సస్ కార్యక్రమాన్ని ఆయన పరిశీలించారు. తాళాలు వేసి ఉన్న ఇండ్లను సైతం వదిలిపెట్టకుండా, మరోసారి వెళ్లి పక్కాగా డేటా సేకరించాలని ఎన్యుమరేటర్లకు దిశానిర్దేశం చేశారు. ఆయన వెంట డీసీ శైలజ, ఈఈ రమేశ్ బాబు, టౌన్ ప్లానింగ్ అధికారులు ఉన్నారు.
