వివాదాస్పద స్వామీజీ నిత్యానంద పరారీలో ఉన్నాడు. తనను తాను దేవుడిగా పిలుచుకునే నిత్యానంద.. కైలాస అనే హిందూ దేశాన్ని ఏర్పాటు చేశాడని ఆమధ్య వార్తలు వచ్చాయి. విదేశాల్లో ఓ ద్వీపాన్ని కొనుగోలు చేసిన నిత్యానంద.. దానికి సంబంధించి ప్రత్యేక రాజ్యాంగాన్ని ఏర్పాటు చేసినట్లు వార్తలు వచ్చాయి. ఆ దేశానికి నిత్యానందే ప్రధాని అని కూడా తెలుస్తోంది. తాజాగా నిత్యానంద ‘కైలాస’ గురించి మరికొన్ని వార్తలు ప్రచారంలోకి వస్తున్నాయి. అయితే ఈ కైలాస ఎక్కడ ఉందనే లొకేషన్ మాత్రం ఎవరికీ అంతుపట్టడం లేదు. ఆస్ట్రేలియాకు దరిదాపులో ఉండొచ్చునని అనుమానిస్తున్నారు. ప్రత్యేక స్థానం అనేది లేని ఈ దేశాన్ని పర్యటించే వారి కోసం వీసాలను జారీ చేస్తున్నట్లు తెలుస్తోంది. దీనికి సంబంధించి ప్రత్యేక ఈ-మెయిల్ ఐడీని క్రియేట్ చేశారు. ఆ మెయిల్ ద్వారా విజిటర్స్ వీసాకు దరఖాస్తు చేసుకోవచ్చు. అయితే ఈ దేశాన్ని పర్యటించే విజిటర్లు కేవలం మూడ్రోజులే ఇక్కడ ఉండేందుకు అనుమతిస్తారని సమాచారం. ఈ మేరకు కైలాస.ఓఆర్జీలో కొన్ని వివరాలు ఉన్నాయి. ఆస్ట్రేలియా నుంచి కైలాసకు విమానాలు నడుపనున్నట్లు తెలుస్తోంది. తమ సొంత దేశాల్లో హిందూజంను పాటించడంలో ఇబ్బందులు ఎదుర్కొన్న వారు నిత్యానందతో కలసి కైలాసను ఏర్పాటు చేసినట్లు తెలుస్తోంది.
