న్యూఢిల్లీ: ఢిల్లీలోని సత్య నికేతన్ ప్రాంతంలో ఐదంతస్తుల పీజీ హాస్టల్ బిల్డింగ్ కుప్పకూలి ఏడుగురు మరణించిన ఘటనలో కీలక పరిణామం చోటు చేసుకుంది. హాస్టల్ బిల్డింగ్ ఓనర్ను ఢిల్లీ పోలీసులు అరెస్ట్ చేశారు. ఈ ఘటన తర్వాత పరారీలో ఉన్న బిల్డింగ్ యాజమాని హరిరామ్ గుప్తాను సోమవారం (సెప్టెంబర్ 7) రాజస్థాన్లోని భివాడీ ప్రాంతంలో అదుపులోకి తీసుకున్నట్లు పోలీసులు తెలిపారు. కేసు దర్యాప్తులో భాగంగా హరిరామ్ను విచారిస్తున్నట్లు పోలీసులు వెల్లడించారు.
ఆదివారం (సెప్టెంబర్ 6) మధ్యాహ్నం దక్షిణ ఢిల్లీలోని సత్య నికేతన్ ప్రాంతంలో ఐదంతస్తుల బాయ్స్ పీజీ హాస్టల్ బిల్డింగ్ కుప్పకూలిన విషయం తెలిసిందే. ఈ ఘటనలో ఇప్పటి వరకు ఏడుగురు మరణించగా.. మరికొందరు తీవ్రంగా గాయపడి ఆసుపత్రిలో చికిత్స పొందుతున్నారు. ఈ ఘటనను కేంద్ర హోంశాఖ మంత్రి అమిత్ షా, ఢిల్లీ సీఎం రేఖా గుప్తా తీవ్రంగా పరిగణించారు. నిందితులపై కఠిన చర్యలు తీసుకోవాలని ఆదేశించారు.
ఢిల్లీ పోలీసులు ఈ ఘటనపై కేసు నమోదు చేసుకుని దర్యాప్తు చేపట్టారు. ఈ ఘటన తర్వాత పరారీలో ఉన్న హస్టల్ బిల్డింగ్ ఓనర్పై పోలీసులు లుకౌట్ నోటీసులు జారీ చేశారు. నిందితుడిని అరెస్ట్ చేసేందుకు ప్రత్యేక బృందాలను ఏర్పాటు రంగంలోకి దించారు. ఈ క్రమంలోనే రాజస్థాన్లోని భీవాడి ప్రాంతంలో సోమవారం (సెప్టెంబర్ 7) బిల్డింగ్ ఓనర్ హరిరామ్ను ఢిల్లీ పోలీసులు అదుపులోకి తీసుకున్నారు. అతడిని ఢిల్లీకి తరలించి విచారిస్తున్నారు.
