పాలమూరు-రంగారెడ్డి ప్రాజెక్టు ఖర్చు 40 శాతం పెంపు

•     7, 11, 15, 17 ప్యాకేజీల రివైజ్డ్​ ఎస్టిమేట్స్​కు కేబినెట్​ ఓకే

హైదరాబాద్, వెలుగు: పాలమూరు రంగారెడ్డి ప్రాజెక్టు ఖర్చు అంచనాలు పెరిగాయి. మూడేండ్ల నుంచి ఇరిగేషన్​ శాఖ నుంచి ప్రతిపాదనలు పంపుతున్నా.. ఆర్థిక శాఖ నుంచి అనుమతులు రాకపోవడంతో అంచనా వ్యయాలు పెరిగిపోయాయి. ఆ ప్రాజెక్టు ప్రాధాన్యం దృష్ట్యా తాజాగా రివైజ్డ్​ ఎస్టిమేట్స్​కు కేబినెట్​ ఆమోదం తెలిపింది. నాలుగు ప్యాకేజీల పనులకు సంబంధించి 40 శాతం వరకు అంచనా వ్యయాలను పెంచేందుకు ఓకే చెప్పింది. శుక్రవారం జరిగిన కేబినెట్​ భేటీలో.. ప్రాజెక్టులోని 7, 11, 15, 17 ప్యాకేజీలకు సంబంధించిన రివైజ్డ్​ ఎస్టిమేట్స్​కు ప్రభుత్వం ఆమోదం తెలిపింది. ప్యాకేజీ 7లో భాగంగా ఏదుల రిజర్వాయర్​తో వట్టెం రిజర్వాయర్​ను కలిపేలా నిర్మిస్తున్న కెనాల్​లో 6.4 కిలోమీటర్​ నుంచి 25.4 కిలోమీటర్​ వరకు ట్విన్​ టనెల్​ నిర్మాణానికి గతంలో రూ.2,263.10 కోట్లతో అంచనాలు సిద్ధం చేశారు. అయితే, తాజాగా మరో రూ.918 కోట్లు పెంచేందుకు ప్రభుత్వం ఓకే చెప్పింది. రూ.3,181.10 కోట్ల రివైజ్డ్​ ఎస్టిమేట్స్​కు కేబినెట్​ ఆమోదం తెలిపింది. ఇక, ప్యాకేజీ 11లో భాగంగా వట్టెం రిజర్వాయర్​ బండ్​ ఫార్మేషన్​కు  రూ.1,680.70 కోట్లతో ఎస్టిమేట్స్ ఇవ్వగా.. ఇప్పుడు దానికి అదనంగా రూ.682.75 కోట్లు పెంచి రూ.2,363.45 కోట్ల రివైజ్డ్​ ఎస్టిమేట్స్​కు ఓకే చెప్పారు. ప్యాకేజీ​15లోని కురుమూర్తిరాయ రిజర్వాయర్​ కోసం రూ.976.70 కోట్లతో శాంక్షన్​ ఇవ్వగా.. ఇప్పుడు అదనంగా రూ.491.85 కోట్లు పెంచారు. దీనికి రూ.1,468.55 కోట్ల రివైజ్డ్​ ఎస్టిమేట్స్​కు కేబినెట్​ ఓకే చెప్పింది. ప్యాకేజీ 17లో ఉద్ధండాపూర్ రిజర్వాయర్​ ఫార్మేషన్​ కోసం రూ.643 కోట్లతో శాంక్షన్​ ఇవ్వగా.. ఇప్పుడు అదనంగా రూ.260.78 కోట్లు పెంచి రూ.903.78 కోట్లకు రివైజ్​ చేశారు. దానికి కేబినెట్​ ఆమోదం తెలిపింది.