బీహార్లో జరిగిన ఓ హత్యోదాంతం అక్కడి ప్రజల్ని ఉలిక్కి పడేలా చేసింది. ఈ ఘటనలో బాధితురాలు మృతదేహం ఛిద్రమైంది. పోలీసులు తెలిపిన వివరాల ప్రకారం.. ఖగారియా జిల్లాలోని పస్రాహా గ్రామానికి చెందిన సులేఖా దేవి(45) పొలం పనులు చేస్తూ జీవనం సాగిస్తోంది. ఈ క్రమంలో ఆమెను గుర్తు తెలియని వ్యక్తులు దారుణంగా హత్య చేశారు. దుండగులు ఆమె కళ్లు, రొమ్ములు కోసి, ప్రైవేటు భాగాలను ఛిద్రం చేసి అత్యంత పాశవికంగా హత్య చేయడం స్థానికంగా సంచలనం సృష్టించింది. ఆమె పొలానికి వెళ్లినప్పుడే ఈ ఘోరం జరిగిందని పోలీసులు తెలిపారు.
గతంలో భర్త.. బావమరిది
సులేఖా దేవి భర్త బబ్లూ సింగ్, బావమరిది కూడా 2014లో హత్య కు గురయ్యారు. భర్త హత్య కేసులో నిందితులు గతేడాది బెయిల్పై విడుదలయ్యారు. అయితే సులేఖ హత్య వెనక భూ తగాదా ఏమైనా ఉందా అని పోలీసులు అనుమానిస్తున్నారు. కచ్చితమైన సమాచారాన్ని తెలుసుకునేందుకు దర్యాప్తు ముమ్మరం చేశారు.
ఘటనా స్థలంలో కత్తి స్వాధీనం చేసుకున్నట్లు ఎస్డీపీవో మనోజ్కుమార్ తెలిపారు. బాధితురాలి బంధువులతో పాటు స్థానికులు పస్రాహా పోలీస్ స్టేషన్ సమీపంలో జాతీయ రహదారిని దిగ్బంధించి నిరసనకు దిగడంతో గంటల తరబడి ట్రాఫిక్ జామ్ అయింది.సంఘటనా స్థలానికి ఎస్డీపీవో చేరుకుని నిందితులను పట్టుకుంటామని కఠిన శిక్ష పడేలా చేస్తామని బంధువులకు హామీ ఇవ్వడంతో నిరసన విరమించారు.
