కామారెడ్డి, వెలుగు: కామారెడ్డి టౌన్లో మంగళవారం ఉదయం ఒక యువతి ఇంటిదగ్గర పని చేసుకుంటుండగా గుర్తు తెలియని వ్యక్తులు గొంతు కోశారు. బాధిత కుటుంబీకులు తెలిపిన వివరాల ప్రకారం.. కామారెడ్డిలోని బర్కత్పురాకు చెందిన నాయబ్ హబీబ్కు నిజామాబాద్లోని మాలపల్లికి చెందిన నిషాక్ ఫిర్దౌస్ (21)తో తొమ్మిది నెలల కింద పెళ్లి జరిగింది. హబీబ్ డ్రైవర్గా పని చేస్తుండగా, ఆమె ఇంట్లోనే ఉంటుంది. మంగళవారం ఉదయం ఇంటి ముందు ఫిర్దౌస్ పని చేసుకుంటోంది. భర్త ఇంటి లోపల ఉండగా, ఆమె మామ ఇంటికి కొద్ది దూరంలో వాకింగ్ చేస్తున్నారు. సడన్గా గుర్తు తెలియని వ్యక్తులు వచ్చి ఆమె మీద దాడిచేసి.. గొంతు కొశారు. రక్తపు మడుగులో ఉన్న ఆమెను జిల్లా హాస్పిటల్కు తరలించారు. కామారెడ్డి డీఎస్పీ సోమనాథం, టౌన్ సీఐ మధుసూదన్ ఘటనా స్థలానికి వెళ్లి పరిశీలించారు. క్లూస్ టీమ్, డాగ్స్వ్వాడ్ ను రప్పించారు. ఫిర్దౌస్ రెండు నెలల కిందట ఉరి వేసుకొని ఆత్మహత్యకు యత్నించినట్లు తెలుస్తోంది. పోలీసులు పలు కోణాల్లో విచారణ చేస్తున్నారు. బాధితురాలు మాట్లాడితే మరిన్ని వివరాలు తెలిసే అవకాశం ఉంది.
