కుషాయిగూడ, వెలుగు : ములాఖాత్కి వచ్చే ఖైదీల భార్యల్ని వేధిస్తున్న చర్లపల్లి జైల్ డిప్యూటీ సూపరిటెండెంట్ చింతల దశరథంపై బదిలీ వేటు పడింది. జీవిత ఖైదీగా శిక్ష అనుభవిస్తున్న సయ్యద్ బాషాతో పాటు ములాఖాత్కు వచ్చే మహిళల ఫిర్యాదు మేరకు జైళ్ల శాఖ డీజీ జితేందర్ ఈ చర్యలు తీసుకున్నారు. తన భార్య ములాఖాత్కు వచ్చినప్పుడల్లా దశరథం అసభ్యకరంగా ప్రవర్తిస్తున్నాడని సయ్యద్ బాషా, సోమవారం జైలు ఉన్నతాధికారులకు కంప్లైంట్ చేశాడు. ఈ విషయాన్ని అక్కడి అధికారులు డీజీ జితేందర్ దృష్టికి తీసుకెళ్లారు. దీంతో దశరథంను ఓపెన్ ఎయిర్ జైల్కు ట్రాన్స్ఫర్ చేస్తూ మంగళవారం ఆయన ఉత్తర్వులు జారీ చేశారు. దశరథంకు సంబంధించిన న్యూడ్ వీడియోలు కూడా ఇటీవల బయటికొచ్చాయి. ఖైదీల ప్రవర్తనలో మార్పులు తీసుకురావాల్సిన దశరథం, ఇలాంటి నేరాలకు పాల్పడుతుండటంతో డీజీ సీరియస్ అయ్యారు. మరోసారి ఇలాంటి ఆరోపణలు వస్తే కఠిన చర్యలు తీసుకోవాల్సి వస్తుందని హెచ్చరించారు.
