- ఈ నెల 23 నుంచి మార్చి 14 వరకు దరఖాస్తులు
- వయోపరిమితి రెండేండ్లు పెంపు..
- యూనిఫామ్ సర్వీసెస్ పోస్టులకూ వర్తింపు
- అత్యధికంగా ఎంపీడీవో పోస్టులు 140, డీఎస్పీ పోస్టులు 115
- మే లేదా జూన్ లో ప్రిలిమ్స్.. సెప్టెంబర్ లేదా అక్టోబర్లో మెయిన్స్
- 1:50 ఓపెన్ మెరిట్ ద్వారా మెయిన్స్కు ఎంపిక
హైదరాబాద్, వెలుగు: గ్రూప్ 1 నోటిఫికేషన్ను టీఎస్పీఎస్సీ రిలీజ్ చేసింది. కొత్తగా 60 పోస్టులు కలుపుతూ మొత్తం 563 పోస్టులకు నోటిఫికేషన్ ఇచ్చింది. పాత (2022 నాటి) నోటిఫికేషన్ను రద్దు చేసి.. గంటలోనే కొత్తదాన్ని విడుదల చేసింది. సోమవారం సాయంత్రం టీఎస్పీఎస్సీ కమిటీ సమావేశం జరిగింది. 503 పోస్టుల భర్తీకి రెండేండ్ల కింద ఇచ్చిన పాత నోటిఫికేషన్ రద్దు చేయాలని ఈ సమావేశంలో నిర్ణయించారు. అనంతరం రద్దు చేస్తున్నట్లు ప్రకటించారు. ఆ తర్వాత మరిన్ని పోస్టులతో కలిపి కొత్త నోటిఫికేషన్ విడుదల చేశారు. గ్రూప్ 1 దరఖాస్తుదారుల వయోపరిమితిని ప్రభుత్వం రెండేండ్లకు పెంచింది. ఇది యూనిఫామ్ సర్వీసెస్ పోస్టులకు కూడా వర్తిస్తుందని తాజాగా జీవో ఇచ్చింది. కొత్త ప్రెసిడెన్షియల్ ఆర్డర్ ప్రకారం ఉద్యోగాల భర్తీలో స్థానికులకే 95% పోస్టులను కేటాయించనున్నట్టు కమిషన్ ప్రకటించింది.
పాతోళ్లకు నో ఫీజ్
ఈ నెల 23 నుంచి దరఖాస్తుల ప్రక్రియ మొదలు కానుంది. మార్చి 14వ తేదీ సాయంత్రం 5 గంటల వరకు టీఎస్పీఎస్సీ సైట్లో ఆన్ లైన్ ద్వారా అప్లయ్ చేసుకోవచ్చు. గత నోటిఫికేషన్కు దరఖాస్తు చేసుకున్నవాళ్లు కూడా ఇప్పుడు అప్లయ్ చేసుకోవాలని, అయితే.. వాళ్లు మాత్రం ఫీజు చెల్లించాల్సిన అవసరం ఉండదని పేర్కొంది.
కొత్త వారికి మాత్రం అప్లికేషన్ ప్రాసెస్ ఫీజు రూ.200, ఎగ్జామినేషన్ ఫీజు రూ.120 ఉంటుందని వెల్లడించింది. నిరుద్యోగులకు ఎగ్జామినేషన్ ఫీజు (రూ.120) నుంచి మినహాయింపు ఉంటుంది. దరఖాస్తు చేసే సమయంలోనే రీఅప్లై , ఫ్రెష్ అనే వాటిని ఎంచుకొని అప్లై చేసుకోవచ్చు. అప్లికేషన్ ఎడిట్ ఆప్షన్ మార్చి 23 ఉదయం 10 గంటల నుంచి అదే నెల 27వ తేదీ సాయంత్రం 4గంటల వరకు ఉంటుంది.
మే లేదా జూన్ లో ప్రిలిమ్స్
గ్రూప్ 1 ప్రిలిమినరీ ఎగ్జామ్ మే లేదా జూన్ లో నిర్వహించనున్నట్టు టీఎస్పీఎస్సీ తెలిపింది. త్వరలోనే ఎగ్జామ్ డేట్ను ప్రకటిస్తామని పేర్కొంది. ఆఫ్ లైన్ పద్ధతిలో 33 జిల్లాల్లో పరీక్షా కేంద్రాలను ఏర్పాటు చేస్తామని చెప్పింది. అభ్యర్థులు దరఖాస్తు సమయంలో పరీక్షా కేంద్రం కోసం పది జిల్లాలకు ప్రిఫరెన్స్ ఆర్డర్ ఇవ్వాల్సి ఉంటుంది. ప్రిలిమ్స్ ఎగ్జామ్ ఆధారంగా సెప్టెంబర్ లేదా అక్టోబర్ నెలలో గ్రూప్ 1 మెయిన్ ఎగ్జామ్ నిర్వహిస్తామని టీఎస్పీఎస్సీ ప్రకటించింది. ప్రిలిమ్స్ రిజల్ట్ తర్వాతే మెయిన్ ఎగ్జామ్ డేట్లను రిలీజ్ చేస్తామని స్పష్టం చేసింది. మెయిన్ ఎగ్జామ్ గ్రేటర్ హైదరాబాద్ (హెచ్ఎండీఏ పరిధి)లో లేదా ఇతర జిల్లా కేంద్రాల్లో నిర్వహించే అవకాశం ఉంది. గ్రూప్1 ప్రిలిమ్స్ ఆబ్జెక్టివ్ టైప్లో నిర్వహించనుండగా.. మెయిన్స్కు మాత్రం రాత పరీక్ష ఉంటుంది.
సుప్రీంకోర్టులో కేసు వెనక్కి తీసుకొని..
తెలంగాణ ఏర్పడిన తర్వాత దాదాపు ఎనిమిదేండ్ల తర్వాత అప్పట్లో బీఆర్ఎస్ ప్రభుత్వం గ్రూప్ 1న నోటిఫికేషన్ ఇచ్చింది. 2022 ఏప్రిల్ 26న 503 పోస్టులతో టీఎస్పీఎస్సీ నోటిఫికేషన్ విడుదల చేసింది. దీనికి 2022 అక్టోబర్ 11న ప్రిలిమ్స్ ఎగ్జామ్ జరగ్గా.. 2.85 లక్షల మంది అటెండ్ అయ్యారు. ప్రిలిమ్స్ రిజల్ట్ కూడా ఇచ్చారు. 1:50 రేషియోలో 25 వేల మందిని మెయిన్స్కు ఎంపిక చేశారు. అయితే, పేపర్ లీక్ కావడంతో గ్రూప్ 1ను రద్దు చేశారు. ఆ తర్వాత జూన్ 11న రెండో సారి గ్రూప్ 1 ప్రిలిమ్స్ పెట్టగా.. 2.33 లక్షల మంది రాశారు. ఈ పరీక్ష రిజల్ట్ కూడా ఇచ్చారు. అయితే, ప్రిలిమినరీ ఎగ్జామ్ నిర్వహణలో లోపాలున్నాయనే కారణంతో హైకోర్టు ఆ పరీక్షను రద్దు చేసింది. ఇట్ల రెండు సార్లు రద్దయింది. ఈ క్రమంలో సుప్రీంకోర్టును టీఎస్పీఎస్సీ ఆశ్రయించింది. కాగా, సుప్రీంకోర్టులో వేసిన కేసును టీఎస్పీఎస్సీ సోమవారం వెనక్కి తీసుకున్నది. దీంతో పాత నోటిఫికేషన్ రద్దు చేసి.. 60 పోస్టులను కలిపి కొత్త నోటిఫికేషన్ను విడుదల చేసింది.
ఓపెన్ మెరిట్ ఆధారంగా 1: 50 ద్వారా మెయిన్స్కు..
గ్రూప్ 1 ప్రిలిమ్స్ ద్వారా మెయిన్స్కు అభ్యర్థులను ఎంపిక చేస్తారు. దీంట్లో 563 పోస్టులకు గానూ 1:50 రేషియోలో మెరిట్ అభ్యర్థుల ఎంపిక ఉంటుంది. అయితే, గతంలో 2022 నోటిఫికేషన్లో ప్రిలిమ్స్ ఎగ్జామ్ లో కేటగిరి, రిజర్వేషన్ల ఆధారంగా 1:50 రేషియోలో మెయిన్స్కు ఎంపిక చేశారు. దీనిద్వారా మెరిట్ స్టూడెంట్లకు అన్యాయం జరుగుతుందనే వాదనలతో టీఎస్పీఎస్సీ కొత్తగా ఓపెన్ మెరిట్ ఆధారంగా మెయిన్స్కు పిలవాలని నిర్ణయం తీసుకున్నది.
మల్టీజోన్ 1లో 258.. మల్టీజోన్ 2లో 305
రాష్ట్రవ్యాప్తంగా గ్రూప్ 1 ద్వారా 563 పోస్టులను భర్తీ చేయనుండగా.. దీంట్లో మల్టీ జోన్ 1లో 258, మల్టీ జోన్ 2లో 305 పోస్టులున్నాయి. పోస్టుల్లో అత్యధికంగా ఎంపీడీవో పోస్టులు 140 ఉండగా, డిప్యూటీ సూపరింటెండెంట్ ఆఫ్ పోలీస్ (డీఎస్పీ) పోస్టులు 115 ఉన్నాయి. ఆ తర్వాత కమర్షియల్ ట్యాక్స్ ఆఫీసర్ పోస్టులు 48, డిప్యూటీ కలెక్టర్ పోస్టులు 45, మున్సిపల్ కమిషనర్ గ్రేడ్ -2 పోస్టులు 41 ఉన్నాయి. అత్యల్పంగా డిస్ట్రిక్ట్ ట్రైబల్ వెల్ఫేర్ ఆఫీసర్ (డీటీడబ్ల్యూవో) పోస్టులు రెండు మాత్రమే ఉన్నాయి.. అవి కూడా మల్టీ జోన్ 2లోనే ఉన్నాయి. డిస్ట్రిక్ట్ సోషల్ వెల్ఫేర్ ఆఫీసర్/ డిస్ట్రిక్ట్ షెడ్యూల్డ్ క్యాస్ట్ డెవలప్మెంట్ ఆఫీసర్ పోస్టులు మూడు ఉన్నాయి.
గ్రూప్1 నోటిఫికేషన్ వివరాలు...
పోస్టులు: 563 (మల్టీజోన్ 1: 258,
మల్టీజోన్ 2: 305)
దరఖాస్తులు: ఫిబ్రవరి 23 నుంచి
మార్చి 14 వరకు
ఎడిట్ ఆప్షన్: మార్చి 23 నుంచి 27 వరకు
ప్రిలిమినరీ ఎగ్జామ్: మే/జూన్, 2024
మెయిన్ ఎగ్జామ్: సెప్టెంబర్ /అక్టోబర్, 2024
కేటగిరీ వారీగా పోస్టుల వివరాలు...
కేటగిరీ పోస్టులు
ఓసీ (ఓపెన్ కేటగిరీ) 209
ఈడబ్ల్యూఎస్ 49
బీసీ–ఏ 44
బీసీ–బీ 37
బీసీ–సీ 13
బీసీ–డీ 22
బీసీ–ఈ 16
ఎస్సీ 93
ఎస్టీ 52
పీహెచ్ 24
స్పోర్ట్స్ 4
ప్రతి కేటగిరీలో హారిజంటల్
విధానంలో మహిళలకు
33 శాతం రిజర్వేషన్ల అమలు
