కేసీఆర్ పాలనపై జనంలో విరక్తి పెరుగుతోంది
కల్వకుంట్ల రాజ్యం అడ్డుకుంటాం
కేసీఆర్ నిరంకుశ పాలనపైనే నా పోరాటం
అమిత్ షాతో భేటీ తర్వాత వివేక్ కామెంట్స్
తెలంగాణ రాష్ట్రంలో కల్వకుంట్ల నిరంకుశ రాజ్యాన్ని పోగొట్టి… బీజేపీ పాలన తెస్తామన్నారు మాజీ ఎంపీ వివేక్ వెంకటస్వామి. ఢిల్లీలోని పార్లమెంట్ నార్త్ బ్లాక్ లో అమిత్ షాను మర్యాదపూర్వకంగా కలిసి బీజేపీలో చేరుతున్నట్టు చెప్పిన తర్వాత… ఆయన రాష్ట్ర బీజేపీ నాయకులతో కలిసి మీడియాతో మాట్లాడారు. ఒక ఓటు రెండు రాష్ట్రాలు అన్న నినాదంతో ప్రత్యేక తెలంగాణకు కట్టుబడి స్వరాష్ట్ర సాధనలో సహకరించిన పార్టీ బీజేపీలో చేరడం సంతోషంగా ఉందన్నారు.
ప్రజల ఆకాంక్ష తోనే తాను బీజేపీలో చేరుతున్నానని చెప్పారు. కేసీఆర్ పాలనపై రోజురోజుకూ జనంలో విరక్తి పెరిగిపోతోందన్నారు వివేక్ వెంకటస్వామి. “ప్రజలను కేసీఆర్ నియంతృత్వ పాలనతో మోసం చేస్తున్నారు. కేసీఆర్ కు గుణపాఠం చెబుతాం. సీనియర్ నాయకులు, యువ ప్రజాప్రతినిధులు అందరం కలిసి.. కేసీఆర్ నియంతృత్వ పాలనను ఎదుర్కొంటాం. కల్వకుంట్ల రాజ్యం చేయాలని కేసీఆర్ ప్రయత్నిస్తున్నారు. ఆయన ప్రయత్నాన్ని అడ్డుకుని ప్రజాస్వామిక తెలంగాణ లక్ష్యంతో బీజేపీపాలన తెస్తాం. ప్రభుత్వ ప్రజా వ్యతిరేక నిర్ణయాలపై.. నిజామాబాద్ ఎంపీ, కరీంనగర్ ఎంపీలతో కలిసి పోరాడుతా. సాయంత్రం పార్టీ వర్కింగ్ ప్రెసిడెంట్ నడ్డాను కలిసి బీజేపీలో చేరుతున్నా” అని చెప్పారు వివేక్ వెంకటస్వామి.
ఉద్యమకారులను ఖతం చేయాలనుకుంటున్నారు
మాటిచ్చి తప్పడం కేసీఆర్ కు అలవాటైందని అన్నారు వివేక్. రాజకీయాల్లో ఉన్న తనకు పెద్దపల్లి ఎంపీ టికెట్ ఇస్తానని చెప్పి మాటతప్పాడని గుర్తుచేశారు. తెలంగాణలో ఉద్యమకారులను, మంచి నాయకులను కేసీఆర్ ఖతం చేయాలనుకుంటున్నారని అన్నారు వివేక్ వెంకటస్వామి. హరీష్ రావు, ఈటల రాజేందర్, జితేందర్ రెడ్డి, కోదండరాం.. ఇలా ఉద్యమకారులందరినీ రాజకీయాలనుంచి పక్కకు తొలగించే ప్రయత్నం చేస్తున్నారని అన్నారు. పూటకో మాట చెబుతూ గందరగోళపరుస్తున్న కేసీఆర్ పై జనంలో రోజురోజుకూ వ్యతిరేకత, విరక్తి పెరుగుతోందన్నారు. ఆయన పదే పదే మాటతప్పుతున్నారు. కొడుకును సీఎం చేయడానికి సెక్రటేరియట్ కూల్చివేత నిర్ణయం తీసుకున్నారని.. కేసీఆర్ ను గద్దె దించితేనే ప్రజాపరిపాలన వస్తుందన్నారు.
కేసీఆర్ పార్టీ మారలేదా… వివేక్ ప్రశ్న
“2002లో డిప్యూటీ స్పీకర్ గా ఉన్నప్పుడు.. ఆశించిన పదవి రాకుంటే కేసీఆర్ కూడా పార్టీ మారారు. ప్రజల ఆకాంక్షకు తగ్గట్టుగా పార్టీ మారడంలో తప్పేంకాదు. కేసీఆర్ నియంతృత్వ పాలన వద్దు అనేది జనం ఆకాంక్ష. బీజేపీ మంచి పాలన అందిస్తోంది. నేను బీజేపీలోకి వెళ్తున్నానని చెబితే.. ఊహించని స్పందన వచ్చింది. రాబోయే రోజుల్లో మోడీ సారథ్యంలో తెలంగాణ బీజేపీని అధికారంలోకి తెచ్చేందుకు ప్రయత్నిస్తాం” అని వివేక్ చెప్పారు.
