తుంగభద్ర డ్యామ్గేట్లు మార్చితే తెలంగాణకేం లాభం? : మాజీ మంత్రి హరీశ్ రావు

• సీఎం రేవంత్​ను నిలదీసిన మాజీ మంత్రి హరీశ్ రావు ప్రశ్నించారు.  
• కృష్ణా జలాల్లో రాష్ట్రానికి దక్కాల్సిన వాటా గురించి ప్రజలకు సమాధానం చెప్పాలని డిమాండ్

హైదరాబాద్, వెలుగు: తుంగభద్ర డ్యామ్ గేట్లు మార్చినంత మాత్రాన తెలంగాణకు ఏం లాభమని సీఎం రేవంత్​రెడ్డిని మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్​రావు ప్రశ్నించారు.  కర్నాటకలోని తుంగభద్ర డ్యామ్ గేట్లు మార్చినందుకు సంబురాలు చేసుకోవడం ఆపి, కృష్ణా జలాల్లో తెలంగాణకు దక్కాల్సిన న్యాయమైన వాటా గురించి సీఎం రాష్ట్ర ప్రజలకు సమాధానం చెప్పాలని గురువారం ఒక ప్రకటనలో డిమాండ్​చేశారు. ‘‘తుంగభద్ర డ్యామ్, ఆర్డీఎస్ మధ్యలో దాదాపు 35 టీఎంసీలు వాడుకునేలా కర్నాటక ప్రభుత్వం నవేలి రిజర్వాయర్ నిర్మించాలని చూస్తోంది.

ఆర్డీఎస్, సుంకేసుల మధ్య 20 టీఎంసీలు వాడుకునేలా గుండ్రేవుల ప్రాజెక్టు కట్టాలని ఏపీ సర్కార్ ప్లాన్ చేస్తోంది. ఈ రెండు ప్రాజెక్టుల వల్ల కృష్ణా జలాల్లో తెలంగాణ వాటాకు గండిపడుతుంది. ఈ ప్రాజెక్టుల విషయంలో తెలంగాణకు అన్యాయం జరగకుండా రేవంత్ రెడ్డి ఎందుకు అభ్యంతరం తెలపలేదు?  తెలంగాణకు దక్కాల్సిన 15.90 టీఎంసీల వాటాను సాధించారా? ఏండ్లుగా అపరిష్కృతంగా ఉన్న ఆర్డీఎస్ సమస్యలను పరిష్కరించారా? రాష్ట్రానికి మేలు చేసే ఈ కీలక అంశాలపై ఆంధ్రప్రదేశ్, కర్నాటక రాష్ట్రాల నుంచి కచ్చితమైన హామీలేమైనా తీసుకున్నారా? ఈ ప్రధాన సమస్యల్లో ఏ ఒక్కటీ పరిష్కారం కాకుండా జరిగిన సమావేశం సువర్ణ అధ్యాయం ఎలా అవుతుంది’’ అని హరీశ్​రావు ప్రశ్నించారు.

కేవలం తుంగభద్ర డ్యామ్ గేట్లు మార్చినంత మాత్రాన రాష్ట్రానికి రావాల్సిన 15.90 టీఎంసీల నీరు ఎలా వస్తుందో సీఎం  సమాధానం చెప్పాలన్నారు. రాష్ట్ర నీటి హక్కులకు ముప్పుగా మారే కొత్త ప్రాజెక్టులను సీఎం ఎందుకు వ్యతిరేకించలేకపోయారని నిలదీశారు.