మంచిర్యాల(లక్సెట్టిపేట), వెలుగు: మంచిర్యాల జిల్లాలో వేధింపులు తట్టుకోలేక సుపారీ ఇచ్చి భర్తను చంపించిందో భార్య. 16 నెలల తర్వాత ఈ విషయం వెలుగులోకి వచ్చింది. మంచిర్యాల ఏసీపీ అఖిల్మహాజన్ మంగళవారం లక్సెట్టిపేట పీఎస్ లో ప్రెస్మీట్పెట్టి వివరాలు వెల్లడించారు. లక్సెట్టిపేటకు చెందిన రసమల్ల శైలజ, గోదావరిఖనికి చెందిన రవికుమార్ ప్రేమించుకుని 2007లో పెళ్లి చేసుకున్నారు. వీరికి కూతురు పుట్టింది. కొన్నేళ్ల తర్వాత ఇద్దరి మధ్య మనస్పర్థలు రావడంతో 2018లో విడాకులు తీసుకున్నారు. డైవర్స్తీసుకున్న నెలలోనే మళ్లీ కలిసి పోయారు. కొన్నాళ్లకే మళ్లీ ఇద్దరి మధ్య గొడవలు మొదలయ్యాయి. వేధింపులు తట్టుకోలేకపోయిన శైలజ.. భర్త రవికుమార్ని చంపాలని స్కెచ్వేసింది. గంగరాజు, సాయికుమార్ అనే ఇద్దరికి రూ.లక్ష సుపారీ ఇచ్చింది. 2020జూన్ 2న గంగరాజు రవికుమార్ను మద్యం తాగుదామని ఇటిక్యాల చెరువు వద్దకు తీసుకెళ్లాడు. మొదట బీర్ సీసా, బండరాయితో రవిని కొట్టి చంపారు. తర్వాత చెరువు పొదల్లో పడేశారు. రవికుమార్ కోసం ఎంత వెతికినా ఆచూకీ దొరకపోవడంతో అదే ఏడాది డిసెంబర్లో అతని చెల్లి దివ్య పోలీసులకు కంప్లైంట్ చేసింది. శైలజను అడగగా రవి జగిత్యాల, వరంగల్లో ఉన్నాడని చెబుతూ నమ్మించింది. కొన్నాళ్లకు దివ్యతోపాటు ఆమె కుటుంబ సభ్యులకు శైలజపై అనుమానం రావడంతో మళ్లీ ఫిర్యాదు చేశారు. విచా రణలో భార్యే భర్తను చంపించినట్లు తెలిసింది. శైలజ, సాయికుమార్‌‌‌‌ను పోలీసులు రిమాండ్కు తరలించారు. గంగరాజు పరారీలో ఉన్నాడు.
