Yastika Bhatia: లండన్లోని ప్రసిద్ధ లార్డ్స్ క్రికెట్ మైదానంలో (Lord's Cricket Ground) భారత మహిళల క్రికెట్ జట్టు సరికొత్త చరిత్ర లిఖించింది. ఇంగ్లాండ్ వర్సెస్ భారత్ మహిళల జట్ల మధ్య జరుగుతున్న ఏకైక టెస్ట్ మ్యాచ్ మూడో రోజు ఆటలో టీమిండియా స్టార్ బ్యాటర్ యాస్తికా భాటియా అద్భుతమైన ప్రదర్శనతో ఆకట్టుకుంది. లార్డ్స్ స్టేడియంలో టెస్టు క్రికెట్ చరిత్రలోనే సెంచరీ సాధించిన మొట్ట మొదటి మహిళా క్రికెటర్గా యాస్తికా (Yastika Bhatia) నిలిచి, సరికొత్త ప్రపంచ రికార్డును తన పేరుపై లిఖించుకుంది. క్రికెట్ మక్కాగా పిలవబడే ఈ చారిత్రాత్మక స్టేడియంలో ఇప్పటి వరకు ఏ మహిళా బ్యాటర్ కూడా సెంచరీ చేయకపోవడం.. ఇండియన్ ప్లేయర్ సాధించింది.
యాస్తికా ఊచకోత.. చారిత్రాత్మక సెంచరీ:
ఈ మ్యాచ్లో యాస్తికా భాటియా ప్రత్యర్థి బౌలర్లను ఎదుర్కొంటూ బాధ్యతాయుతమైన ఇన్నింగ్స్ ఆడింది. కేవలం 145 బంతుల్లోనే 12 ఫోర్ల సహాయంతో యాస్తికా తన కెరీర్లోనే చిరస్మరణీయమైన తొలి అంతర్జాతీయ టెస్ట్ సెంచరీ కొట్టింది. ఇది టెస్ట్ ఫార్మాట్లో ఆమెకు తొలి శతకం కావడం గమనార్హం. అంతకుముందు రోజు ఆట ముగిసే సమయానికి క్రీజులో ఉన్న యాస్తికాకు, మూడో రోజు ఉదయం తొలి బంతికే అదృష్టం కలిసివచ్చింది. ఇంగ్లాండ్ బౌలర్ లారెన్ బెల్ వేసిన మొదటి బంతి యాస్తికా ఆఫ్ స్టంప్ను తాకినప్పటికీ, బెయిల్స్ కింద పడకపోవడంతో ఆమె క్లీన్ బౌల్ అయ్యే ప్రమాదం నుంచి తృటిలో తప్పించుకుంది. ఆ లక్ కలిసి రావడంతో చెలరేగిన ఆమె లార్డ్స్ స్టేడియంలో సెంచరీ చేసింది.
లార్డ్స్ ఆనర్స్ బోర్డుపై ఇద్దరు భారత ప్లేయర్స్ పేర్లు:
ఈ అద్భుతమైన సెంచరీతో యాస్తికా భాటియా లార్డ్స్ క్రికెట్ గ్రౌండ్లోని ప్రతిష్టాత్మక లార్డ్స్ ఆనర్స్ బోర్డు (Lord's Honours Board) పై చోటు సంపాదించుకుంది. అయితే ఈ మ్యాచ్లో లార్డ్స్ బోర్డుపై స్థానం సంపాదించిన రెండో భారత ప్లేయర్ యాస్తికా కావడం విశేషం. అంతకు ముందు ఇంగ్లండ్ మహిళల జట్టు ఆడిన మొదటి ఇన్నింగ్స్లో భారత బౌలర్ క్రాంతి గౌడ్ (Kranti Gaud) సంచలన బౌలింగ్తో విరుచుకుపడి 5 వికెట్ల హాల్ (Five-Wicket Haul) సాధించింది. ఒకే టెస్ట్ మ్యాచ్లో అటు బౌలింగ్లో క్రాంతి గౌడ్, ఇటు బ్యాటింగ్లో యాస్తికా ఇద్దరూ లార్డ్స్ గౌరవాన్ని అందుకోవడం భారత క్రికెట్కే గర్వకారణంగా మారింది.
ప్రపంచ క్రికెట్లో మారుమోగుతున్న భారత్ పేరు:
మహిళల క్రికెట్ చరిత్రలో ఈ లార్డ్స్ టెస్ట్ మ్యాచ్ ఒక మైలురాయిగా నిలిచిపోనుంది. పురుషుల క్రికెట్కు ఏమాత్రం తీసిపోని విధంగా టీమిండియా మహిళా క్రికెటర్లు విదేశీ గడ్డపై, అందులోనూ ఇంగ్లాండ్లోని కఠినమైన పరిస్థితులలో ఆ జట్టుపైనే ఆధిపత్యం చెలాయించడం విశేషం. బౌలింగ్లో క్రాంతి, బ్యాటింగ్లో యాస్తికా చూపించిన అద్భుతమైన ప్రదర్శనతో ఇండియా ఈ ఏకైక టెస్ట్ మ్యాచ్పై పూర్తి పట్టు సాధించే దిశగా దూసుకెళ్తోంది. నెట్టింట యాస్తికా భాటియా చారిత్రాత్మక సెంచరీపై మాజీ క్రికెటర్లు, అభిమానులు పెద్ద ఎత్తున అభినందనలు తెలియజేస్తున్నారు.
One that she will remember for a long long time 🤩
— BCCI Women (@BCCIWomen) July 12, 2026
📸 📸 The moment Yastika Bhatia got to a 𝗺𝗮𝗴𝗻𝗶𝗳𝗶𝗰𝗲𝗻𝘁 𝗺𝗶𝗹𝗲𝘀𝘁𝗼𝗻𝗲 🥳
Updates ▶️ https://t.co/O1rEau8j8n #TeamIndia | #ENGvIND | @YastikaBhatia pic.twitter.com/eZunhKpSrp
