- ప్లీనరీలో ప్రశంసల వర్షం
హైదరాబాద్, వెలుగు: మహా నాయకుడు.. లోక నాయకుడు.. లౌకిక నాయకుడు.. యుగానికొక్కడు.. కారణజన్ముడు.. తెలంగాణ విధాత.. తెలంగాణ బాపు.. ఇట్లా ఒకటా రెండా, ఎన్నో.. ఎన్నెన్నో.. టైటిళ్లు. అంతకు మిం చిన ట్యాగ్లైన్లు. హైదరాబాద్లో ఎటూ చూసినా కేసీఆర్ను కీర్తిస్తూ టీఆర్ఎస్ లీడర్లు బ్యానర్లు, హోర్డింగ్ లు పెట్టేశారు. టీఆర్ఎస్ ప్లీనరీ సందర్భంగా అధినేతను ఆహో ఓహో అని పొగిడేందుకు గతంలో ఎన్నడూ లేనంతగా ప్రచార పటాటోపం ప్రదర్శించారు. ప్లీనరీ వేదికపైన కూడా కేసీఆర్పై ప్రశంసల వర్షం కురిపించారు.
టైటిల్స్ లో పోటీ
గ్రేటర్ హైదరాబాద్లోని బస్ స్టాప్ లు, చౌరస్తాలు, ఫ్లై ఓవర్లు.. ఎక్కడ చూసినా కేసీఆర్ ఫొటోలు, ఆయనను కీర్తించే టైటిల్సే కనిపించాయి. ఒక టైటిల్కు.. మరో దానికి పోటీ అన్నట్లుగా వీటిని లీడర్లు తీర్చిదిద్దడం అందరినోటా చర్చనీయాంశమైంది. అయితే.. ఇందులో తమ గొప్పేమీ లేదని, పార్టీ ఆవిర్భవించిన 20 ఏండ్ల పండుగ కావటంతో స్వయంగా పార్టీ అధినేతే ఈసారి ప్రచారాన్ని డిజైన్ చేశారని, అందుకే టైటిళ్లు కూడా ఆలోచింపజేసేలా ఉన్నాయని కొందరు టీఆర్ఎస్ లీడర్లు అన్నారు.