- సర్పంచ్, ఉపసర్పంచ్ పదవుల పంపకానికి పలు జీపీల్లో చర్చలు
- కొన్నిచోట్ల పోటీ., మరికొన్ని చోట్ల ఏకగ్రీవాలకు ప్రయత్నాలు
- మానుకోట జిల్లాలో 236 జీపీల్లో ఎస్టీలకు సర్పంచ్ రిజర్వేషన్
మహబూబాబాద్, వెలుగు: పరిపాలన సౌలభ్యానికి అప్పటి ప్రభుత్వం గిరిజన తండాలు, ఆదివాసి గూడాలను గ్రామపంచాయతీలుగా ఏర్పాటు చేసింది. దీంతో గ్రామ పంచాయతీ ఎన్నికల్లో 500 కంటే తక్కువగా ఓటర్లు ఉండటంతో తండాల్లో కొన్నిచోట్ల తీవ్ర పోటీ నెలకొనగా.. పలుచోట్ల ఏకగ్రీవాలకు అవకాశం ఉండనుంది.
ఎక్కువగా తండాల్లో పెద్ద కుటుంబాలకు చెందిన వారు ఉండటంతో వారు ఎటువైపు మొగ్గు చూపితే వారికే పదవులు దక్కనున్నాయి. కాగా, మహబూబాబాద్ జిల్లాలో 236 గ్రామాల్లో ఎస్టీలకే సర్పంచ్ పదవులకు రిజర్వేషన్ ఉండడంతో గిరిపుత్రులే ఇక్కడ సర్పంచ్స్థానంలో కూర్చోనున్నారు.
తండా జీపీల్లో పెద్ద కుటుంబాల మాటే చెల్లుబాటు
మానుకోట జిల్లాలో 482 సర్పంచ్ పదవుల్లో ఎక్కువగా వంద శాతం ఎస్టీ జనాభాతో 133 జీపీలు, షెడ్యూల్ ఏరియా జీపీలు103 మొత్తంగా 236 జీపీల్లో ఎస్టీలకే సర్పంచ్ పదవులు దక్కనున్నాయి. ఇవి పోనూ నాన్ షెడ్యూల్ ఏరియాల్లోనూ ఎస్టీలకు పదవులు దక్కుతున్నాయి. గతంలో రవాణా సదుపాయం, ఇతర కారణాలతో కొన్నిచోట్ల 500 కంటే తక్కువగా ఓటర్లు ఉన్న తండాలను గ్రామపంచాయతీలుగా గుర్తించారు.
ఇటీవల కొన్ని తండాలు కొత్తగా జీపీలుగా ఆవిర్భవించాయి. దీంతో జిల్లాలో గిరిజన సర్పంచుల హవా కొనసాగనుంది. తండాల్లో ఎక్కువగా పెద్ద కుటుంబాలకు చెందిన వారు రొటేషన్ పద్ధతిలో పదవులను పంచుకుంటున్నారు. సర్పంచ్ పదవి ఒకరికి దక్కితే మరొకరికి ఉపసర్పంచ్ పదవి దక్కేలా ప్లాన్ చేసుకుంటున్నారు.
కుటుంబాల మధ్యపోటీలు ఉండకుండా జాగ్రత్త వహిస్తున్నారు. కొన్ని చోట్ల మాత్రం ఐక్యత కుదరడం లేదు. తొలుత నామినేషన్లు వేసి విత్ డ్రా సమయం వరకు వేచి చూసే ధోరణిలో ఉంటున్నారు. ఎన్నికలు జరిగినా తండాల్లో పెద్ద కుటుంబాలు ఒకే ఇంటి పేరు కలిగిన వారు ఎటు మొగ్గు చూపితే పదవులన్నీ అటే దక్కే అవకాశాలు ఎక్కువగా ఉన్నాయి.
తండాలో మా కుటుంబాలే ఎక్కువ..
నెల్లికుదురు మండలం రత్తిరాంతండా పరిధిలో గూగులోతు వంశానికి చెందిన కుటుంబాలు ఎక్కువగా ఉన్నాయి. గతంలో సర్పంచ్ పదవి గుగులోత్ బిక్కు నాయక్ దక్కించుకున్నారు. ఈసారి ఎస్టీ మహిళకు సర్పంచ్ పదవి రిజర్వేషన్ అయినందున అందరం మాట్లాడుకుని సమర్ధులను ఎంపిక చేస్తాం. - గుగులోతు ఝంకి, రత్తిరాంతండా జీపీ
పనిచేసేటోళ్లకే పదవి..
రత్తిరాం తండాల్లో సర్పంచ్ పదవి కోసం అనేక కుటుంబాలకు చెందిన వారు పోటీపడుతున్నప్పటికీ, పని చేసేటోళ్లకు తండా అభివృద్ధి కోసం పాటుపడే వారికి పదవి దక్కనుంది. సాధ్యమైనంత మేరకు ఎన్నికల వరకు వెళ్లకుండా ఏకగ్రీవంగా నిర్ణయం తీసుకునే అవకాశం ఉంది.- గుగులోతు తాలు, రత్తిరాంతండా
