హైదరాబాద్ శివార్లలో ఘోర రోడ్డు ప్రమాదం సంభవించింది. శంషాబాద్ సమీపంలోని ఓఆర్ఆర్ (ORR) వద్ద జరిగిన ఈ ప్రమాదంలో ఆరుగురు అక్కడికక్కడే మృతి చెందారు .
పెద్దగోల్కొండ ఔటర్ రింగ్ రోడ్డు ఎగ్జిట్ నెంబర్ 16 దగ్గర ఆగి ఉన్న ఓ లారీని.. వెనుక నుంచి వచ్చిన కారు అతివేగంగా ఢీకొట్టింది. ఈ ధాటికి కారు తునకలైపోయింది. కారులో ప్రయాణిస్తున్న ఏడుగురిలో.. ఆరుగురు ఘటనా స్థలంలోనే ప్రాణాలు కోల్పోయారు. మరొకరి పరిస్థితి అత్యంత విషమంగా ఉంది.
మృతులంతా శంషాబాద్ నుంచి గచ్చిబౌలి వైపు వస్తుండగా ఈ ప్రమాదం జరిగినట్లు తెలుస్తోంది. అతివేగమే ఈ ఘోర ప్రమాదానికి కారణమని ప్రాథమికంగా నిర్ధారించారు. స్థానికుల సమాచారంతో పోలీసులు ఘటనా స్థలానికి చేరుకుని, బాధితులను ఆసుపత్రికి తరలించారు.
కేసు నమోదు చేసిన పోలీసులు.. మృతులు ఎవరు? ఎక్కడి నుంచి వస్తున్నారు? అనే కోణంలో దర్యాప్తు జరుపుతున్నారు. ఈ విషాద ఘటనతో ఓఆర్ఆర్ పరిసర ప్రాంతాల్లో విషాద ఛాయలు అలముకున్నాయి.
