వెలుగు ఓపెన్ పేజీ : తమిళనాడు, బెంగాల్ సంచలన రిజల్ట్స్ ఏం చెప్తున్నాయి?

ఐదు రాష్ట్రాల ఎన్నికల ఫలితాలలో కొన్ని సర్​ప్రైజ్​  రిజల్ట్స్​ తప్పలేదు. ముఖ్యంగా తమిళనాట సీనీ హీరో విజయ్​ నేతృత్వంలోని టీవీకే అనూహ్య విజయాలు సాధించడం పొలిటికల్​ ఎక్స్​పర్ట్స్ కు ​ సర్పైజ్​ కలిగించాయని చెప్పాలి.  అలాగే, పశ్చిమ బెంగాల్​లో బీజేపీ అధికారంలోకి వస్తుందని చాలా సర్వేలు చెప్పినా, రాజకీయ విశ్లేషకులు మాత్రం టఫ్​ ఫైట్​ ఉండనుందని విశ్వసించారు. కానీ ఫలితాలు చూస్తే, అక్కడ మెజారిటీ, మైనారిటీ పోలరైజేషన్​ కొంత ఊహించని విధంగా జరిగిందని ఫలితాలే చెపుతున్నాయి. ఇకపోతే, అస్సాంలో ఎగ్జిట్​ పోల్స్​ అంచనాలనే నిజం చేస్తూ బీజేపీ గెలుపు సాధించింది. కేరళంలో యూడీఎఫ్​ గెలుపు కాంగ్రెస్​ పార్టీకి పెద్ద ఊరటగా చెప్పాలి. ఇక పుదుచ్చేరిలో అధికారంలో ఉన్న ఎన్​డీఏనే తిరిగి మెజారిటీ సాధిస్తుందని రాజకీయ పండితుల్లో  మొదటి నుంచీ  ఉన్న అభిప్రాయమే నిజమైంది.

 తమిళనాట మొదటి నుంచి సీనీ రంగమే అక్కడి రాజకీయాలను శాసిస్తూవస్తున్న విషయం తెలిసిందే. ఎంజీఆర్​, కరుణానిధి, జయలలిత  సీనీ రంగం నుంచి వచ్చిన వారే. ఆ తర్వాత రాజకీయ అరంగేట్రం చేసిన సీనీ ప్రముఖులు చాలా మందే ఉన్నారు. కానీ ఎవరూ గెలవలేకపోయారు. శివాజీ గణేశన్​, కే, భాగ్యరాజ్​, టీ. రాజేందర్​ లాంటి వారు పార్టీలు స్థాపించి ఘోర పరాజయాలు మూటకట్టుకున్నారు. విజయకాంత్​ పార్టీ పెట్టి కొంత విజయం సాధించినా, కొనసాగలేకపోయారు. 

స్టాలిన్​ మాస్​ కాలేకపోయాడు! 

1967 నుంచి ద్రవిడ రాజకీయాలకు తమిళనాడు పుట్టినిల్లు. ఎమ్జీఆర్, కరుణానిధి, జయలలిత హయాంలు ముగిసాక.. 2021లో స్టాలిన్​ నేతృత్వంలో డీఎంకే అధికారం చేపట్టింది. ముఖ్యమంత్రి స్టాలిన్​  నిజానికి మాస్​ లీడర్​ కాకపోయినా, ద్రవిడ రాజకీయ పంథాను మాత్రం నడిపే ప్రయత్నం నిరంతరం చేస్తూవచ్చాడు. కానీ అది పెద్దగా వర్కవుట్​ అయినట్లు కనిపించలేదు. హిందీ వ్యతిరేకత, ఉత్తారాది వ్యతిరేకత, దక్షిణాదికి అన్యాయం అంటూ ఆయన గత ఐదేళ్లుగా వార్తల్లో కనిపిస్తూ వస్తున్నారు కూడా. కానీ ద్రవిడ వాదాన్ని బలంగా వినిపించినా.. పరిపాలనలో అంతే పాపులర్​ కాలేకపోయాడని ఫలితాలు చెపుతున్నాయి.  మొదటి నుంచీ డీఎంకే కుటుంబ పార్టీగా  పేరుపడి ఉంది. అవినీతి ఆరోపణలు కూడా బలంగానే వినిపించాయి.   ప్రత్యామ్నాయంగా అన్నా డీఎంకే ఉన్నా, ఎందుకో గానీ పళనిస్వామి నేతృత్వంలో ఆ పార్టీ ప్రత్యామ్నాయంగా ప్రజలను ఆకర్షించలేకపోయిందని గత లోక్​సభ ఎన్నికలతో పాటు, ప్రస్తుత అసెంబ్లీ ఎన్నికల ఫలితాలు కూడా అదే విషయాన్ని చెపుతున్నాయి. 

పొలిటికల్​ స్పేస్​ను అందిపుచ్చుకున్న విజయ్​

తమిళనాట డీఎంకేకు ప్రత్యామ్నాయంగా జయలలిత తర్వాత ఏఐడీఎంకే  బలహీనపడింది. దాన్ని గమనించే విజయ్​ టీవీకే పార్టీని ఫిబ్రవరి 2, 2024న స్థాపించాడని చెప్పొచ్చు. రాజకీయ రంగంలో పార్టీ స్థాపించి మొదటిసారే అధికారంలో వచ్చిన వారు ఎమ్జీఆర్​, ఆ తర్వాత ఎన్టీఆర్​, ఇపుడు విజయ్​.  అలా అని పార్టీలు పెట్టిన  సీనీ హీరోలందరూ సక్సెస్​ కాలేదు.  అందుకు సమయం, సందర్భం, రాజకీయాల్లో స్పేస్​ ఉన్నపుడు స్థాపించి, ప్రజల్ని ఆకర్షిస్తే తప్ప ఏ  పార్టీ సక్సెస్ సాధించలేదు. సరిగ్గా విజయ్​ సమయం, సందర్భం, రాజకీయ శూన్యత ఉన్న పరిస్థితుల్లోనే పార్టీ స్థాపించి సక్సెస్​ సాధించాడని చెప్పాలి.  సీనీ హీరోగా విజయ్​  బాగా పాపులర్​. అందునా యువకుడు. ఆయన పార్టీని స్థాపించడం తమిళనాట యువతలో ఒక ఉత్సాహాన్ని తెచ్చింది. 

తమిళనాట అర్బన్​ ప్రాంతాల్లో  టీవీకే క్లీన్​ స్వీప్​ చేసిందని చెప్పాలి.  అర్బన్​ ప్రాంతాలలో లాగా   గ్రామీణ ప్రాంతాల్లో  టీవీకే ప్రభావం చూపలేకపోయింది.  గ్రామీణ ప్రాంతాల్లో ఎక్కువగా డీఎంకే, అన్నాడీఎంకేనే పోటీపడ్డాయి.  ఆ విషయం ఫలితాల్లో స్పష్టంగా కనిపిస్తోంది. నిజంగానే విజయ్​ పార్టీ గ్రామీణ ప్రాంతాల్లోనూ బాగా ప్రభావం చూపి ఉంటే, టీవీకే పార్టీ 107 స్థానాల వద్దనే ఆగిపోయేది కాదు, సుమారు 150 స్థానాల వరకు గెలుచుకునేది అని చెప్పొచ్చు. ఏదేమైనా, తమిళనాట, మరొక ద్రవిడ పార్టీ ఉదయించింది. టీవీకే మెజారిటీకి 8 స్థానాల దూరంలో ఉన్నా.. కాబోయే సీఎం మాత్రం విజయ్​ యే అని రూఢీ అయింది. ఇక తెలియాల్సింది జాతీయ రాజకీయాల్లో ఆయన వైఖరి ఎలా ఉండబోతుంది? ఎన్డీఏ, ఇండియా కూటములలో ఏ కూటమిలోనైనా చేరుతారా? లేదా రెండు కూటములకు సమదూరం పాటిస్తారా? అనేదే ప్రస్తుతానికి అసక్తిగా ఎదురు చూడాల్సిన విషయం!

ఎస్​ఐఆర్​ రాజకీయం

తమిళ నాడు సర్పైజ్​​​ ఫలితాలు ఒకవైపు, మరోవైపు పశ్చిమ బెంగాల్​లో టీఎంసీ- బీజేపీకి ఫిఫ్టీ ఫిఫ్టీ ఛాన్స్ ఉందని​  భావించిన రాజకీయ పండితుల అభిప్రాయానికి భిన్నంగా, బీజేపీ భారీ విజయాన్ని సాధించింది. గత 3 నెలలుగా బెంగాల్​ రాజకీయాలు చాలా హాట్​గా సాగుతూ వచ్చాయి. మమతా బెనర్జీ రాజకీయం  ఎన్నికల కమిషన్ చుట్టే తిరిగింది. రాజకీయంగా బీజేపీతో కాకుండా ఈసీతో చేసిన పోరాటం ఆమెకు లాభం చేసిందనే కన్నా, కొంత నష్టమే చేసిందని ఎన్నికల ఫలితాలు చెపుతున్నాయి. ఫలితంగా మెజారిటీ, మైనారిటీ పోలరైజేన్​ జరిగింది. అది మమతకు ఏమేరకు లాభం చేసింది కొంతే, బీజేపీకే జరిగిన లాభం ఎక్కువ. ఇకపోతే, బెంగాల్​ ప్రజలు చొరబాటు దారులకు ఎస్ఐఆర్​  ఎంతో కొంత చెక్​ పెడుతుందనే  భావించారు.  అయితే, దీదీ మాత్రం ఎన్నికల కాలమంతా ఎస్ఐఆర్​పై నే నిరంతరం పోరాటం చేస్తూ ఉండిపోయింది. అది ఆమెకు మైనారీటీ పోలరైజేషన్​ ను  మరింత పెంచింది ఎంత నిజమో, కొంతమేర మెజార్టీలను ఆమెకు దూరం చేసిందనేది కూడా అంతే నిజం. అది పరోక్షంగా బీజేపీకి మెజార్టీ పోలరైజేషన్​ జరగడానికి అవకాశమిచ్చిందని ఫలితాల తర్వాత రాజకీయ పండితులు చెపుతున్నారు.

హింస ప్రభావం

దీదీ ఓటమికి గల కారణాలలో శాంతి భద్రతల సమస్య కూడా పనిచేసింది. ఆర్జీకర్​ మెడికల్​ కాలేజీలో జరిగిన​ సంఘటన, సందేశ్​ ఖాళీ వంటి ఉదంతాలు దీదీ కి ఇబ్బందిగా మారాయి. ఎన్నికల్లో రెండు లక్షల సాయుధ బలగాలను దించారని దీదీ ఈసీ ని తప్పుపట్టింది. నిజానికి బెంగాల్​లో  ఏ ఎన్నికలు కూడా ఇప్పటి వరకు శాంతి యుతంగా జరిగిన దాఖలా లేదు. ఇప్పటి వరకు హింసా సంఘటనలు, హత్యలు జరగని ఎన్నికలు లేవు. కేంద్ర బలగాలను దించడం వల్లనే  ప్రజలు భయం లేకుండా ఓటేశారని, హింసలేకుండా మొదటిసారి పోలింగ్​ కూడా 92 శాతం జరిగిందని రాజకీయ విశ్లేషకులు చెపుతున్నారు. 

వలసల ప్రభావం

సంక్షేమ పథకాలే రాజకీయాలను శాశ్వతంగా నడపలేవని బెంగాల్​ ఫలితాలు చెపుతున్న సారాంశం. ​ మహిళలకు  లక్కీ బండార్ లాంటి​ రూ.1500 నగదు పథకాలతో దీదీ గెలుస్తాననుకున్నది. కానీ అవి ఓట్లకు మాత్రమే పరిమితమై, ఉపాధి మార్గాలు చూపకపోతేనే సమస్య. బెంగాల్​కు పెట్టుబడులు రాకపోవడం, ఇండస్ట్రియలైజేషన్​​ ఆగిపోవడం,  ఫలితంగా బెంగాల్​ ప్రజలు ఇతర రాష్ట్రాలకు వెళుతున్న వలసలకు ఆమె ప్రభుత్వం పరిష్కారం చూపలేకపోయింది. లక్షలాది బెంగాలీలు దేశ వ్యాప్తంగా వలసజీవులుగా మారారు..  నందిగ్రామ్​, సింగూర్​ నుంచి టాటా కంపెనీలను స్వయాన దీదీ యే తరిమేసింది. అవి గుజరాత్​కు వెళ్లిపోయాయి.  బెంగాల్​ ప్రజలు ఇపుడు గుజరాత్​ కు వెళ్లి అవే కంపెనీల్లో పనిచేయడం గమనార్హం.  మూడు దఫాలుగా గెలిపించినా, బెంగాల్​లో ఉపాధి మార్గాలు చూపకపోవడం దీదీ ఓటమి కారణాల్లో ఒకటని చెప్పాలి.

మోనోపలి రాజకీయం మారేనా?

దీదీ బలమైన నాయకత్వం బెంగాల్​ రాజకీయాలను  రెండుగా దశాబ్దాలుగా శాసించింది. నిజానికి ఆమె ఈ ఓటమితో కుంగిపోయేది కూడా ఏమీ లేదు. బెంగాల్​ను మొదట్లో 25 ఏండ్ల పాటు కాంగ్రెస్​ పార్టీ పాలించింది. ఆ తర్వాత కమ్యూనిస్టులు 34 ఏండ్లు పాలించారు. ఇపుడు దీదీ 15 ఏండ్లు పాలించింది. పార్టీల మోనోపలి రాజకీయాలకు అలవాటు పడిన బెంగాల్​ ను, ఇపుడు గెలిచిన బీజేపీ కూడా మోనోపలి రాజకీయలను పక్కన పెట్టి, బెంగాల్​ ప్రజల ఆశలను, ఆకాంక్షలను నెరవేరుస్తుందా లేదా అనేదే ఇకపై చూడాల్సిన విషయం.

- కల్లూరి శ్రీనివాస్​రెడ్డి
సీనియర్​ జర్నలిస్ట్​

 

ఓపెన్​ పేజీకి వ్యాసాలు, లెటర్లు పంపాల్సిన మెయిల్​ ఐడీ : openpage@v6velugu.com రచయితలు ‘వెలుగు’ కు మాత్రమే పంపుతున్నామని హామీ తప్పనిసరి రాయాలి. స్వీయ రచన అయి ఉండాలి. రచన 700 పదాలకు మించరాదు.