దళితబంధు ఇప్పిస్తామన్న లీడర్ల మాటలు నమ్మి.. పుస్తెలు అమ్మి కమీషన్ ఇచ్చా అని, చివరికి తన పేరు లిస్ట్లో రాలేదని ఓ మహిళ ఆవేదన వ్యక్తం చేసింది. సోమవారం ములుగు జిల్లా వెంకటాపూర్ మండల కేంద్రంలోని తాళ్లపాడులో దళితబంధు, గృహలక్ష్మి పథకాల్లో అక్రమాలకు వ్యతిరేకంగా దళిత, ప్రజాసంఘాల ఆధ్వర్యంలో పలువురు మహిళలు ధర్నా, రాస్తారోకో చేశారు. ఈ సందర్భంగా గాంధీ విగ్రహానికి పూలమాల వేసి వినతిపత్రం అందజేశారు. తర్వాత దళితబంధు, గృహలక్ష్మి పథకంలో తన పేరు లేకపోవడంపై గడ్డంమీది రమ్య బీఆర్ఎస్ లీడర్లపై మండిపడింది.
రూ.10వేల కమీషన్ ఇస్తే దళితబంధు ఇప్పిస్తామని లోకల్గా ఉన్న బీఆర్ఎస్ నేతలు మాట ఇచ్చారని, దీంతో పుస్తెలు అమ్మి వాళ్లు అడిగిన డబ్బులు చేతిలో పెట్టానన్నారు. పసుపు కొమ్ము కట్టుకొని తిరుగుతున్నా.. లిస్ట్లో తన పేరు రాలేదన్నారు. బీఆర్ఎస్ లీడర్లు తమ అనుచరులు, కార్యకర్తలకు మాత్రమే స్కీమ్లు ఇస్తున్నారని ఆరోపించారు. ఓట్ల కోసం వచ్చే నేతలను చెప్పులతో కొడ్తామంటూ మహిళలు ఘాటుగా హెచ్చరించారు. ప్రభుత్వం అందించే సంక్షేమ పథకాలు అవినీతిమయం అయ్యాయని మాదిగ యువసేన జిల్లా ఇన్చార్జ్ కాడపాక శ్యాం విమర్శించారు. ధర్నాలో కాంగ్రెస్ లీడర్లు శ్రీనివాస్, అల్వాల అయిలయ్య, బోడ తులసమ్మ, శ్యాం, తదితరులు పాల్గొన్నారు.
