పాలకుర్తి, వెలుగు : ఇంటర్ లో ఫెయిల్ అవుతానేమో అన్న భయంతో ఓ యువకుడు ఆత్మహత్య చేసుకున్నాడు. జనగామ జిల్లా పాలకుర్తి మండల కేంద్రానికి చెందిన ఈరెంటి వంశీ ( 20 ) గత ఏడాది ఇంటర్ పరీక్షల్లో ఒక సబ్జెక్ట్ తప్పాడు. గత నెలలో పరీక్షలు నిర్వహించగా రాశాడు. కొద్ది రోజుల్లో ఫలితాలు రాబోతుండగా మళ్లీ ఫెయిల్అవుతానేమోనని భయపడుతున్నాడు. బుధవారం రాత్రి భోజనం చేసిన తర్వాత ఇంట్లో వాళ్ళు టెర్రస్పై పడుకోగా వంశీ ఒక్కడే ఇంట్లో ఉన్నాడు. గురువారం ఉదయం వంశీ తల్లి రాజేశ్వరి కిందకు వచ్చి డోర్కొట్టగా ఎంతకీ తీయలేదు. దీంతో కిటికీలో నుంచి చూడగా వంశీ ఉరి వేసుకొని కనిపించాడు. తర్వాత తలుపులు పగలగొట్టి వెళ్లి చూడగా అప్పటికే ప్రాణం పోయింది. కేసు నమోదు చేసుకొని దర్యాప్తు చేస్తున్నట్లు ఎస్సై సాయి ప్రసన్న కుమార్ తెలిపారు.
