- కాంగ్రెస్ అభ్యర్థుల ప్రకటన.. వచ్చే నెలలో!
- టికెట్ అప్లికేషన్ విధివిధానాలకు సబ్ కమిటీ ఏర్పాటు
- చైర్మన్గా దామోదర రాజనర్సింహ
- ఈ నెల 17 నాటికి విధివిధానాలు ఖరారు
- 18 నుంచి 25 వరకు అప్లికేషన్లకు చాన్స్
హైదరాబాద్, వెలుగు: ఎమ్మెల్యే అభ్యర్థులను వచ్చే నెలలో ప్రకటించేందుకు కాంగ్రెస్ పార్టీ రెడీ అయింది. ఈ మేరకు విధివిధానాలపై కసరత్తు ప్రారంభించింది. టికెట్ అప్లికేషన్ విధివిధానాలకు, అప్లికేషన్ ఫీజుకు సంబంధించి సబ్ కమిటీని ఏర్పాటు చేసింది. సబ్కమిటీకి చైర్మన్గా మాజీ డిప్యూటీ సీఎం దామోదర రాజనర్సింహ, సభ్యులుగా ఏఐసీసీ సెక్రటరీ రోహిత్ చౌదరి, మహేశ్కుమర్ గౌడ్ను నియమించింది. సోమవారం గాంధీభవన్లో కాంగ్రెస్ ఎన్నికల కమిటీ, స్క్రీనింగ్ కమిటీ సమావేశమయ్యాయి.
ఎన్నికల కమిటీ చైర్మన్ రేవంత్ రెడ్డి అధ్యక్షతన జరిగిన ఈ సమావేశానికి స్క్రీనింగ్ కమిటీ చైర్మన్ మురళీధరన్, సభ్యులు జిగ్నేశ్ మేవానీ, బాబా సిద్ధిఖ్తదితరులు హాజరయ్యారు. అభ్యర్థుల లిస్ట్, ఎంపిక విధావిధానాలపై దాదాపు రెండు గంటల పాటు చర్చించారు. సమావేశం అనంతరం పీసీసీ వర్కింగ్ ప్రెసిడెంట్ మహేశ్ కుమార్ గౌడ్ మీడియాతో మాట్లాడుతూ సమావేశం వివరాలను వెల్లడించారు. 17వ తేదీ వరకు విధివిధానాలు ఖరారు చేస్తామని చెప్పారు. 18వ తేదీ నుంచి 25 వరకు డీడీ రూపంలో ఫీజు చెల్లించి ఆశావహులు అప్లికేషన్ ఇవ్వాలన్నారు. టికెట్ కావాలనుకునేవారు గాంధీభవన్లో అప్లయ్ చేసుకోవాలని సూచించారు. సెప్టెంబర్ మొదటి వారంలో మరోసారి ఎన్నికల కమిటీ సమావేశం ఉంటుందని చెప్పారు.
అప్లికేషన్లు పరిశీలించి ఎలక్షన్ కమిటీకి పంపిస్తామని, ఆ తర్వాత స్క్రీనింగ్ కమిటీకి సమర్పిస్తామని తెలిపారు. అప్లయ్ చేసుకున్నోళ్లందరికీ టికెట్ ఇవ్వడం కుదిరేపని కాదన్నారు. టికెట్ల విషయంలో సర్వేలను ప్రామాణికంగా తీసుకున్నా.. పూర్తిగా వాటిపైనా ఆధారపడలేమని స్పష్టం చేశారు. అభ్యర్థుల ఎంపికలో పార్టీ ఎలక్షన్ కమిటీదే కీలక పాత్రని తెలిపారు. అభ్యర్థుల స్క్రీనింగ్ పూర్తయ్యాక లిస్టును పార్టీ సెంట్రల్ ఎలక్షన్ కమిటీ, కాంగ్రెస్ వర్కింగ్ కమిటీకి పంపిస్తామని చెప్పారు. సమావేశంలో కాంగ్రెస్ రాష్ట్ర వ్యవహారాల ఇన్చార్జ్ మాణిక్ రావ్ ఠాక్రే, సీఎల్పీ నేత భట్టి విక్రమార్క, ఎంపీ ఉత్తమ్ కుమార్ రెడ్డి, షబ్బీర్ అలీ, జానా రెడ్డి, బలరాం నాయక్, దామోదర రాజనర్సింహ, సంపత్కుమార్, వంశీచంద్ రెడ్డి, అంజన్ కుమార్ యాదవ్, రేణుకా చౌదరి, జీవన్ రెడ్డి, రోహిత్ చౌదరి, సీతక్క, జగ్గారెడ్డి, పొంగులేటి శ్రీనివాస్ రెడ్డి, సునీతా రావు, శివసేనా రెడ్డి తదితరులు పాల్గొన్నారు.
నన్ను అడగకుండా నియామకమా: పొన్నాల!
సమావేశంలో పీసీసీ చీఫ్ రేవంత్ తీరుపై మాజీ మంత్రి పొన్నాల లక్ష్మయ్య ఆగ్రహం వ్యక్తం చేసినట్టు తెలిసింది. జనగామ డీసీసీ ప్రెసిడెంట్ నియామకం విషయంలో ఆయన తన అసంతృప్తిని వ్యక్తం చేసినట్టు సమాచారం. పీసీసీ మాజీ చీఫ్ను అయిన తనను కనీసం సంప్రదించకుండా ఏకపక్షంగా ఎట్ల నియమిస్తారని ప్రశ్నించారని తెలిసింది. ఎవరెవరినో కలుస్తున్నారుగానీ.. తనను మాత్రం ఎందుకు కలవడం లేదని రేవంత్పై పొన్నాల అసంతృప్తిని వ్యక్తం చేసినట్టు సమాచారం.
జనరల్ సీట్లపైనా చర్చ
జనరల్ సీట్లలో ఎస్సీ, ఎస్టీలకు టికెట్లు కేటాయించే విషయంపైనా చర్చ జరిగినట్టు తెలిసింది. జనరల్ సీట్లలో వారికి అవకాశం కల్పిస్తే ఎన్నికల్లో పార్టీకి కలిసి వస్తుందని నేతలు అభిప్రాయం వ్యక్తం చేసినట్టు సమాచారం. ఎస్సీ, ఎస్టీల జనాభా ఎక్కువగా ఉన్న నియోజకవర్గాల్లో ఓట్లు కన్సాలిడేట్ అయ్యే అవకాశం ఉందని అన్నట్టు తెలిసింది. బీసీలకు కూడా తగిన ప్రాధాన్యం ఇవ్వాలని స్క్రీనింగ్ కమిటీ దృష్టికి తీసుకెళ్లినట్టు సమాచారం. అభ్యర్థులను వీలైనంత తొందరగా ప్రకటించాలని నేతలు డిమాండ్ చేసినట్టు తెలిసింది. గత ఎన్నికల్లో అభ్యర్థులను లేట్గా ప్రకటించడం వల్ల ప్రచారం చేసుకోవడానికి టైం లేకుండా పోయిందని, జనాల్లోకి వెళ్లలేకపోయామని చెప్పినట్టు సమాచారం.
