అచ్చంపేట, వెలుగు : మహిళకు సిజేరియన్ చేసి తల్లీబిడ్డల ప్రాణాలు కాపాడారు అచ్చంపేట ఎమ్మెల్యే డాక్టర్ వంశీకృష్ణ. నాగర్ కర్నూల్ జిల్లా లింగాల మండలం జీలుగుపల్లి గ్రామానికి చెందిన ప్రసన్నకు తొమ్మిది నెలలు నిండినా డెలివరీ కాకపోవడంతో ఆమె బంధువులు అచ్చంపేట హాస్పిటల్కు తీసుకెళ్లారు. నాగర్ కర్నూల్ జిల్లా దవాఖానకు వెళ్లాలని అక్కడి సిబ్బంది సూచించారు. దీంతో వారు శుక్రవారం కుటుంబ సభ్యులతో కలిసి అచ్చంపేటలో ఉన్న ఎమ్మెల్యేను కలిసి సమస్యను వివరించారు.
వెంటనే ఎమ్మెల్యే సదరు గర్భిణిని అచ్చంపేట గవర్నమెంట్ హాస్పిటల్ కు తీసుకెళ్లి అక్కడి వైద్యులతో కలిసి సిజేరియన్ చేశారు. ఆడపిల్ల జన్మించగా తల్లీ బిడ్డలు క్షేమంగా ఉన్నారని ఎమ్మెల్యే తెలిపారు. కాగా ఎమ్మెల్యే వంశీకృష్ణ సర్జన్. అచ్చంపేట, హైదరాబాద్, కల్వకుర్తిలో ప్రాక్టీస్ చేశారు. ఆపదలో ఉన్న నిరుపేద కుటుంబానికి అండగా నిలిచిన ఎమ్మెల్యేను పలువురు అభినందించారు.
