- కేంద్రం తీరుపై రాష్ట్ర ప్రణాళికా సంఘం వైస్ చైర్మన్ చిన్నారెడ్డి ఫైర్
హైదరాబాద్, వెలుగు: మహాత్మా గాంధీ జాతీయ గ్రామీణ ఉపాధి హామీ పథకంలో గాంధీ పేరును తొలగించడం అన్యాయమని రాష్ట్ర ప్రణాళికా సంఘం వైస్ చైర్మన్ డాక్టర్ జి. చిన్నారెడ్డి తెలిపారు. ఆర్ఎస్ఎస్కు చెందిన నాథురామ్ గాడ్సే 1948లో మహాత్ముడిని భౌతికంగా హత్య చేస్తే.. ప్రధాని మోదీ ఉపాధీ హామీ స్కీమ్ నుంచి గాంధీ పేరును తొలగించి బాపూజీని మరోసాని హత్య చేశారని మండిపడ్డారు. పేదల కడుపు కొట్టేందుకే కేంద్రం కుట్రలు చేస్తోందని ఆయన విమర్శించారు.
ఈ మేరకు సోమవారం సెంట్రల్ యూనివర్సిటీ (హెచ్సీయూ)లోని అంబేద్కర్ ఆడిటోరియంలో ఎన్ఎస్ యూఐ, ప్రొఫెషనల్ కాంగ్రెస్ సంయుక్తంగా నిర్వహించిన నేషనల్ సెమినార్కు చిన్నారెడ్డి ముఖ్య అతిథిగా హాజరయ్యారు. ఈ సందర్భంగా ఆయన మాట్లాడారు. మహాత్మా గాంధీ జాతీయ గ్రామీణ ఉపాధి హామీ పథకం ద్వారా దేశవ్యాప్తంగా కోట్లాది మంది ప్రజలు ఉపాధి పొందుతున్నారని గుర్తు చేశారు. ఈ స్కీమ్ ద్వారా కాంగ్రెస్ పార్టీకి మంచి పేరు వస్తోందన్న ఓర్వలేనితనంతోనే మోదీ సర్కార్ గాంధీ పేరును తొలగించిందని ఆరోపించారు.
