న్యూఢిల్లీ, వెలుగు: ఢిల్లీలోని వసంత్ విహార్లో నిర్మిస్తున్న బీఆర్ఎస్ పార్టీ ఆఫీసును గురువారం మధ్యాహ్నం 1:05 గంటలకు కేసీఆర్ ప్రారంభించనున్నారు. పొద్దున వాస్తు పూజతో పాటు సుదర్శన హోమం నిర్వహిస్తారు. మధ్యాహ్నం 12:30 గంట లకు కేసీఆర్ పార్టీ ఆఫీస్కు చేరుకుని పూజ లో పాల్గొంటారు. తర్వాత పార్టీ జెండా ఎగురవేసి కొత్త బిల్డింగ్లోకి వెళ్తారని పార్టీ వర్గాలు తెలిపాయి. ఈ ప్రోగ్రామ్లో పార్టీ కీలక నేతలు, మంత్రులు, ఎంపీలు, ఎమ్మెల్యేలు పాల్గొంటారు. 2021, సెప్టెంబర్ 2న ఆఫీసు నిర్మాణానికి కేసీఆర్ భూమి పూజ చేశారు. మొత్తం 11వేల చదరపు అడుగుల స్థలంలో బిల్డింగ్ నిర్మించారు. జీ ప్లస్3 ఫ్లోర్లు కలిగిన ఈ బిల్డింగ్లో మొత్తం 20 రూంలు ఉంటాయి. అంతేకాకుండా, స్పెషల్గా రెండు సూట్ రూంలు కూడా నిర్మించారు. ఫస్ట్ ఫ్లోర్లో కేసీఆర్ ఆఫీస్, ఆయనకు స్పెషల్ సూట్ రూం కేటాయించారు. అలాగే, పార్టీ వర్కింగ్ ప్రెసిడెంట్ కోసం మరో సూట్ రూంను ఏర్పాటు చేశారు.
