హైదరాబాద్, వెలుగు:పిల్లల హక్కులను రాష్ట్ర ప్రభుత్వం కాలరాస్తున్నదని, వారిని బానిసల్లాగా చూస్తున్నదని కాంగ్రెస్ నేతలు మండిపడ్డా రు. సోమవారం కేటీఆర్ పుట్టినరోజు సందర్భంగా కరీంనగర్ జిల్లాలోని గంగాధరలో ఉన్న జ్యోతిబాపూలే గురుకుల స్కూల్ విద్యార్థులను.. హ్యాపీ బర్త్ డే కేటీఆర్ అనే ఆకారంలో కూర్చోబెట్టి విషెస్ చెప్పించడంపై అభ్యంతరం వ్యక్తం చేశారు. దీనిపై కాంగ్రెస్ కార్పొరేటర్ దరిపల్లి రాజశేఖర్ రెడ్డి నేతృత్వంలోని పార్టీ నేతలు మంగళవారం రాష్ట్ర మానవ హక్కుల కమిషన్లో ఫిర్యాదు చేశారు.
ఈ ఘటనపై విచారణకు ఆదేశించాలని విజ్ఞప్తి చేశారు. ఈ సందర్భంగా పార్టీ వర్కింగ్ ప్రెసిడెంట్ మహేశ్కుమార్ గౌడ్, రాజశేఖర్ రెడ్డి మీడియాతో మాట్లాడారు. కేటీఆర్ మెప్పు పొందేందుకు స్థానిక బీఆర్ఎస్ నేతలు దిగజారుతున్నారని మహేశ్ కుమార్ గౌడ్ మండిపడ్డారు. కేటీఆర్, స్థానిక ఎమ్మెల్యేపై చర్యలు తీసుకోవాల్సిందిగా కమిషన్ను కోరామన్నారు. ఈ ఘటనపై నేషనల్ చిల్డ్రన్ కమిషన్కూ ఫిర్యాదు చేస్తామని దరిపల్లి రాజశేఖర్ రెడ్డి తెలిపారు.
