- కాంగ్రెస్ నేత జైరాం రమేశ్ విమర్శ
న్యూఢిల్లీ: ఇండియా– అమెరికా ట్రేడ్ డీల్పై ప్రధాని నరేంద్ర మోదీని కాంగ్రెస్ విమర్శించింది. ‘హౌడీ మోదీ’ కంటే ‘నమస్తే ట్రంప్’ పైచేయి సాధించారని ఎద్దేవా చేసింది. ఈ డీల్ ఇండియాకు వ్యతిరేకంగా ఉందని.. కౌగిలింతలు, ఫొటోషూట్ల వల్ల పెద్దగా ప్రయోజనం చేకూరలేదని మండిపడింది. ఈ మేరకు శనివారం కాంగ్రెస్ సీనియర్ నేత జైరాం రమేశ్ ‘ఎక్స్’ లో ఓ పోస్ట్ పెట్టారు. ‘‘ట్రేడ్ డీల్ గురించి ఇండియా– అమెరికా జాయింట్ స్టేట్మెంట్లో వివరాలు సరిగ్గా వెల్లడించలేదు.
కానీ, రష్యా నుంచి భారత్ ఇకపై ఆయిల్ను దిగుమతి చేసుకోదని తెలుస్తోంది. దేశంలోని రైతుల ప్రయోజనాలను పణంగా పెట్టి, అమెరికన్ రైతులకు మేలు చేసేలా భారత్ దిగుమతి సుంకాలను తగ్గించనుంది. యూఎస్ దిగుమతులు మూడు రెట్లు పెరగనుండటంతో మన వాణిజ్య మిగులు తుడిచిపెట్టుకుపోతుంది. ఆ దేశానికి భారత్ చేసే ఐటీ, ఇతర సేవల ఎగుమతులపై అనిశ్చితి కొనసాతోంది.
ఈ క్రమంలో మనం ఎగుమతులు చేసే కొన్ని వస్తువులపై మునుపటికన్నా ఎక్కువ సుంకాలు ఉంటాయి. కౌగిలింతలు, ఫొటోషూట్ల వల్ల ఒరిగిందేమీ లేదు. చివరకు ‘హౌడీ మోదీ’ కంటే ‘నమస్తే ట్రంప్’ పైచేయి సాధించారు’’ జైరాం రమేశ్ ఎద్దేవా చేశారు.
