కాలుష్య నివారణకు కఠిన చర్యలు తీసుకోవాలి: కాంగ్రెస్
న్యూఢిల్లీ/ముంబై: దేశ రాజధాని ఢిల్లీలో ఎయిర్ పొల్యూషన్ పరిస్థితి ‘స్లో పాయిజన్’లా ఉందని కాంగ్రెస్ ఆందోళన వ్యక్తం చేసింది. ఈ జాతీయ సమస్యపై అన్ని పక్షాలతో చర్చించిన తర్వాత ప్రభుత్వం కఠిన చర్యలు తీసుకోవాలని కోరింది. సమస్య నివారణకు ఎంపీ స్థాయిలో కమిటీని వేయాలని సూచించింది.
కాంగ్రెస్ నేత సందీప్ దీక్షిత్ ఈమేరకు శనివారం ఢిల్లీలోని ఏఐసీసీ హెడ్ క్వార్టర్స్లో మీడియాతో మాట్లాడారు. ఢిల్లీని పరిపాలిస్తున్న ప్రస్తుత బీజేపీ ప్రభుత్వం, గత ఆప్ ప్రభుత్వం రాజకీయాలు చేయడానికి కేటాయించిన సమయాన్ని కాలుష్య నివారణకు మాత్రం కేటాయించలేదన్నారు. ఢిల్లీలో వాయు కాలుష్యం మితిమీరిపోయిందని, దాదాపు స్లో పాయిజన్ లా మారి ప్రజల ప్రాణాలను పీల్చేస్తోందన్నారు.
పొల్యూషన్ వల్ల ఇక్కడి ప్రజల జీవితకాలం ఆరేడేండ్లు తగ్గిపోతున్నట్టు డాక్టర్లు కూడా చెప్తున్నారని అన్నారు. కాలుష్యానికి ఎన్నో కారణాలు ఉండొచ్చు కానీ ప్రభుత్వాలు జవాబుదారీగా ఉండాల్సిందేనన్నారు. ‘‘పంట పొలాల్లో గడ్డిని తగలబెట్టడం, దీపావళికి టపాసులు కాల్చడం వల్ల తక్కువ పొల్యూషనే వస్తోంది.
వెహికల్స్ వల్లే ఏడాదంతా పొల్యూషన్ ఉంటోంది. దాదాపు వెహికల్స్ పొల్యూషనే 35 % వరకూ ఉంటోంది. ఈ పరిస్థితిని ప్రభుత్వం కట్టడి చేయాలి. లేకపోతే అది ప్రభుత్వమే కాదు” అని సందీప్ దీక్షిత్ అన్నారు. ఎయిర్ పొల్యూషన్ ఇంకా పెరిగితే.. ఢిల్లీ నివాసయోగ్యం కాకుండా పోతుందన్నారు. కాగా, ఢిల్లీలో శనివారం ఉదయం ఎయిర్ క్వాలిటీ వెరీ పూర్ కేటగిరీలో నమోదైంది. ఓవరాల్ ఏక్యూఐ 332గా రికార్డ్ అయింది.
ముంబై ‘గ్యాస్ చాంబర్’లా మారుతోంది..
ఎయిర్ పొల్యూషన్తో ముంబై కూడా ‘గ్యాస్ చాంబర్’లా మారిపోతోందని కాంగ్రెస్ ఆందోళన వ్యక్తం చేసింది. సిటీలో కాలుష్యాన్ని నివారించడంలో బీజేపీ నేతృత్వంలోని రాష్ట్ర సర్కారు ఫెయిల్ అయిందని విమర్శించింది. మహారాష్ట్ర మాజీ మంత్రి, కాంగ్రెస్ లీడర్ వర్ష గైక్వాడ్ ఈ మేరకు శనివారం ముంబైలో మీడియాతో మాట్లాడారు.ముంబైలో పార్టిక్యులేట్ మ్యాటర్(పీఎం2.5) కాలుష్య కారక కణాలు ప్రమాదకర స్థాయికి చేరాయన్నారు.
