- పశ్చిమ కనుమల్లో ఉన్న ఫేమస్ టూరిస్ట్ ప్లేస్ కూర్గ్
- స్కాట్లాండ్ ఆఫ్ ఇండియాగా ప్రసిద్ధి
- పచ్చని చెట్లు, జలపాతాలతో ఆకట్టుకుంటున్న కూర్గ్
- మనదేశంలో కాఫీ ఎక్కువగా పండించేది కూర్గ్ లోనే
పశ్చిమ కనుమల్లో ఉన్న ఫేమస్ టూరిస్ట్ ప్లేస్ కూర్గ్. దీన్నే ‘కొడగు’ అని కూడా అంటారు. కర్ణాటకలో ఉన్నఈ ప్లేస్ కాఫీ తోటలకు ఫేమస్. మనదేశంలో కాఫీ ఎక్కువగా పండించేది ఇక్కడే. కూర్గ్ను ‘స్కాట్లాండ్ ఆఫ్ ఇండియా’ అని పిలుస్తారు. కారణం... స్కాట్లాండ్లో ఉన్నట్టే ఇక్కడ కూడా పచ్చదనం, రకరకాల పూల మొక్కలు, చెట్లతో నిండిన అందమైన లోయలు ఉంటాయి. సముద్రమట్టానికి దాదాపు 900 మీటర్ల ఎత్తులో ఉంటుంది ఈ ప్లేస్. ఇక్కడికి వెళ్లే దారంతా... ఏటవాలుగా కనిపించే కాఫీ తోటలు, వంకర్లు తిరిగిన రోడ్లతో ఎంతో చూడముచ్చటగా ఉంటుంది.
ట్రెక్కింగ్కు ఫేమస్
కొండలు, గుట్టలు, పెద్ద చెట్లతో ఆహ్లాదంగా ఉండే కూర్గ్లో ట్రెక్కింగ్ని చాలా ఎంజాయ్ చేస్తారు టూరిస్ట్లు. ఇక్కడి కాఫీ తోటల్లో నచ్చినంత సేపు తిరగొచ్చు. సాయంత్రం పూట రకరకాల పక్షుల్ని చూస్తూ హాయిగా గడిపేయొచ్చు. ఇక్కడికి వెళ్లడానికి టూర్ ప్యాకేజీలు ఉంటాయి. రెండు రోజుల టూర్ ప్లాన్ చేసుకుంటే కూర్గ్ మొత్తం చూడొచ్చు.
కొడవ తెగ ప్రజలు
ఈ కొండ ప్రాంతంలో ‘కొడవ’ తెగవాళ్లు నివసిస్తుంటారు. వీళ్లు ‘కొడవ’ భాష మాట్లాడతారు. వీళ్లంతా యుద్ధవిద్యల్లో ఆరితేరినవాళ్లు. పెండ్లిండ్లు, ఇతర వేడుకల్లో కత్తులు, బల్లెం, బాణాలు, తుపాకుల్ని చేత పట్టుకుంటారు. పూర్వీకులతో పాటు ఆయుధాల్ని పూజిస్తారు. టూరిస్ట్లకు ఆతిథ్యం కూడా ఇస్తారు. అంతేకాదు మనదేశంలో లైసెన్స్ లేకుండా తుపాకీ ఉపయోగించేం దుకు ఈ తెగ ప్రజలకు అనుమతి ఉంది.
ఇవి కూడా..
కూర్గ్ హిల్స్టేషన్ దగ్గర్లో ప్రసిద్ధ టిబెటన్ దేవాలయం ‘బైలకుప్పె’ ఉంటుంది. ఇది మనదేశంలోనే రెండో పెద్ద టిబెటన్ గుడి. కావేరీ నది మీద ఉన్న అబే వాటర్ఫాల్ని కూడా చూడొచ్చు. కూర్గ్లో చూడాల్సిన మరో ప్లేస్ దుబారే ఎలిఫెంట్ క్యాంప్. ఏనుగులకి మేత వేయొచ్చు. వాటికి స్నానం కూడా చేయించొచ్చు.
ఎండాకాలంలో చాలామంది హిల్స్టేషన్లలో సేదతీరాలి అనుకుంటారు. ఎందుకంటే... ఇక్కడికి వెళ్తే ఎత్తైన కొండలు, వాటి మధ్య ప్రవహించే సెలయేర్లు, దూకే జలపాతాలు, పచ్చని చెట్లని చూస్తూ ప్రకృతిని ఆస్వాదించొచ్చు. వేసవిలో చల్లగా ఉండే ఇలాంటి ప్లేస్లలో హాయిగా గడపొచ్చు. కర్నాటకలోని కూర్గ్ హిల్స్టేషన్ సమ్మర్ టూర్కి బాగుంటుంది. వీకెండ్లో ఇక్కడికి వెళ్తే మనసు నిండా అందమైన జ్ఞాపకాల్ని పోగేసుకోవచ్చు.
