- సీట్ల అమ్మకాలకు చెక్ పెట్టనున్న ఉన్నత విద్యాశాఖ
- వచ్చే ఏడాది నుంచి అమలు చేసే యోచన
- మెరిట్ను పక్కన పెట్టడంపై టీఏఎఫ్ఆర్సీకి ఫిర్యాదులు
- ఇదే విషయంపై కోర్టులో నడుస్తున్న కేసు
హైదరాబాద్, వెలుగు: రాష్ట్రంలోని ప్రైవేటు ఇంజినీరింగ్ కాలేజీల్లో మేనేజ్మెంట్ కోటా సీట్ల అమ్మకాలకు అడ్డుకట్ట వేసేందుకు ఉన్నత విద్యాశాఖ సమాలోచనలు చేస్తోంది. కన్వీనర్ కోటా మాదిరిగానే మేనేజ్మెంట్ కోటా సీట్లనూ కౌన్సెలింగ్ ద్వారానే భర్తీ చేయాలని భావిస్తోంది. ఇదే అంశంపై కోర్టులో కేసు నడుస్తుండడంతో దీనిపై త్వరలోనే నిర్ణయం తీసుకునే అవకాశముంది. రాష్ట్రంలో 161 ప్రైవేటు ఇంజినీరింగ్ కాలేజీలుండగా, వాటిలో లక్షకుపైగా సీట్లున్నాయి. వీటిలో 70% కన్వీనర్ కోటా ద్వారా ఉన్నత విద్యామండలి కౌన్సెలింగ్ ద్వారా భర్తీ చేస్తోంది. మిగిలిన 30% సీట్లను మేనేజ్మెంట్ కోటా కింద యాజమాన్యాలే నింపుకునే అవకాశముంది. అయితే ఆ కోటా సీట్లకు ప్రత్యేక నోటిఫికేషన్ ఇస్తున్నా మేనేజ్మెంట్లు నిబంధనలను పాటించడం లేదు.
ఎక్కువ డబ్బులిచ్చినోళ్లకే సీటు
జేఈఈ, ఎంసెట్ ర్యాంకు, మెరిట్ ఆధారంగా సీట్లను నింపాల్సి ఉండగా, అవేవీ పట్టించుకోవడం లేదు. ఎవరు ఎక్కువ డబ్బులిస్తే వారికే సీట్లను అమ్ముకుంటున్నారు. ఈ విషయమై ఫిర్యాదులు వస్తున్నా.. విద్యా శాఖ అధికారులు పట్టించుకోవడం లేదు. ఈ ఏడాది టీఏఎఫ్ఆర్సీకి ఫిర్యాదులు అందాయి. దీంతో స్టూడెంట్ల నుంచి మేనేజ్మెంట్ కోటా అప్లికేషన్లు తీసుకొని కాలేజీలకు పంపించాయి. కానీ మేనేజ్మెంట్లు ఈ అప్లికేషన్లను లెక్కలోకి తీసుకోలేదు. దీంతో టీఏఎఫ్ఆర్సీ అధికారులకు స్టూడెంట్లు ఫిర్యాదు చేశారు. నిబంధనలకు విరుద్ధంగా సీట్లు నింపితే, ఒక్కో సీటుకు రూ.10 లక్షల ఫెనాల్టీ వేయాలని నిర్ణయించారు. సర్కారు నిర్ణయించిన ఫీజు కంటే ఎక్కువ వసూలు చేస్తే ఒక్కో అడ్మిషన్కు రూ.2 లక్షలు ఫైన్ వేయనునట్టు టీఏఎఫ్ఆర్సీ ప్రకటించింది. ప్రస్తుతం ఎంక్వైరీ నడుస్తోంది. ఇటీవల మేనేజ్మెంట్ కోటా సీట్లనూ సర్కారే కౌన్సెలింగ్ ద్వారా భర్తీ చేయాలని హైకోర్టులోనూ కొందరు కేసు వేశారు. ఏటా దాదాపు అన్ని కాలేజీల్లోనూ ఇదేతంతు నడుస్తున్నట్టు గుర్తించిన అధికారులు, దీనికి శాశ్వత పరిష్కారం చూపాలని నిర్ణయించారు. వచ్చే ఏడాది మేనేజ్మెంట్కోటా సీట్లనూ కౌన్సెలింగ్ ద్వారానే భర్తీ చేయాలని భావిస్తున్నారు. ఈ విషయాన్ని త్వరలోనే సర్కారు దృష్టికి తీసుకుపోవాలని అధికారులు నిర్ణయించారు. సర్కారు అంగీకరించే అవకాశముందని ఓ ఉన్నతాధికారి చెప్పారు. దీంతో వచ్చే ఏడాది మేనేజ్మెంట్ కోటా సీట్లనూ కౌన్సెలింగ్ ద్వారా భర్తీ చాన్స్ ఉంది.