హైదరాబాద్, వెలుగు: తాము ప్రతిపాదించిన సీట్లలో ఏ స్థానాలను కాంగ్రెస్ కేటాయించినా పోటీకి సిద్ధంగా ఉండాలని సీపీఐ స్టేట్ కౌన్సిల్ నిర్ణయించింది. సోమవారం మగ్దుంభవన్ లో జరిగిన సమావేశంలో కాంగ్రెస్ తో పొత్తులపై చర్చించారు. కొత్తగూడెం, హుస్నాబాద్, మునుగోడు, బెల్లంపల్లి, వైరా తదితర సీట్లను ఇవ్వాలని కాంగ్రెస్కు ప్రతిపాదించగా వీటిలో రెండు లేదా మూడు సీట్లు ఇచ్చే చాన్స్ఉందని నేతలు తెలిపారు.
ఇచ్చిన స్థానాల్లో అభ్యర్థులను గెలిపించునేలా ప్రణాళికలు రెడీ చేసుకోవాలని సూచించారు. అయితే కొత్తగూడెం సీటును మాత్రం వదులుకోవద్దని కౌన్సిల్లో రాష్ట్ర ప్రధాన నేతలకు సూచించినట్టు తెలిసింది. సమావేశంలో సీపీఐ జాతీయ కార్యదర్శులు కె.నారాయణ, అజీజ్ పాషా, రాష్ట్ర కార్యదర్శి కూనంనేని సాంబశివరావు, చాడ వెంకట్ రెడ్డి తదితరులు పాల్గొన్నారు.
