విద్యుత్ చార్జీల భారం.. వ్యాపారంలో నష్టం
బతుకమ్మ ఆర్డర్ల క్యాన్సిల్.. ప్రైవేట్ఆర్డర్లు వస్తలేవు
పవర్ రీయింబర్స్మెంట్ హామీని పట్టించుకోని కేటీఆర్
ప్రశ్నార్థకంగా మారిన కార్మికుల ఉపాధి
రాజన్నసిరిసిల్ల, వెలుగు: రాజన్న సిరిసిల్ల జిల్లా టెక్స్టైల్ పార్క్ లో సంక్షోభం నెలకొంది. విద్యుత్ చార్జీల భారం మోయలేక, పెరిగిన ముడి సరుకుల ధరలకు అనుగుణంగా మార్కెటింగ్ లేక, బతుకమ్మ చీరల ఆర్డర్ల రద్దుతో టెక్స్టైల్ పార్క్లోని పరిశ్రమలు ఆర్థిక నష్టాల్లో కూరుకుపోయాయి. వచ్చే నెల 1 నుంచి టెక్స్టైల్ పార్క్లోని అన్ని యూనిట్లను బంద్ చేయాలని యజమానులు నిర్ణయించారు. 2002లో ప్రారంభమైన సిరిసిల్ల టెక్స్టైల్పార్క్ 1,200 మంది కార్మికులకు ప్రత్యక్షంగా, 2000 మంది కార్మికులకు పరోక్షంగా ఉపాధి కల్పిస్తోంది. టెక్స్టైల్ పార్క్లో 112 యూనిట్లు ఉన్నాయి. మొదట్లో పరిశ్రమలు లాభాల బాటలోనే నడిచాయి. రాష్ట్ర ప్రభుత్వం బతుకమ్మ చీరలు ఆర్డర్లు ఇచ్చిన తర్వాత పనిభారం పెరిగింది. దాంతో ప్రైవేట్ఆర్డర్లు తగ్గించారు. ముంబయ్, మహారాష్ట్రకు చెందిన ప్రైవేట్ఆర్డర్లు ప్రస్తుతం సిరిసిల్లకు రావడం లేదు. అదే సమయంలో ఈ ఏడాది టెక్స్టైల్ పార్క్కు బతుకమ్మ చీరల ఆర్డర్లు రద్దు చేస్తూ చేనేత జౌళిశాఖ నిర్ణయం తీసుకుంది. దీంతో టెక్స్టైల్ పార్క్లోని పరిశ్రమల పరిస్థితి అగమ్యగోచరంగా మారింది. రంజాన్, ఆర్వీఎం, ఇతర ఆర్డర్లు ఇచ్చినా.. వాటితో వారం రోజుల పని కూడా దొరకడం లేదు. దీనికి తోడు విద్యుత్ చార్జీల భారం పరిశ్రమపై పడింది. యూనిట్కు రూ. 3.75 పైసలున్న విద్యుత్చార్జీలు ప్రస్తుతం యూనిట్కు రూ.8 చేశారని యజమానులుపేర్కొంటున్నారు. సిరిసిల్లలో విద్యుత్ రాయితీ 50 శాతం ఇస్తుండగా టెక్స్టైల్పార్క్కు ఇవ్వడం లేదని వాపోతున్నారు. రాయితీకి సంబంధించి రీయింబర్స్మెంట్ ఇప్పిస్తానని నాలుగున్నరేండ్ల క్రితం మంత్రి కేటీఆర్ఇచ్చిన హామీ నేటికీ నెరవేరలేదన్నారు. దీనికితోడు యారన్ రేట్లు విపరీతంగా పెరిగాయని అంటున్నారు. ఇప్పటికే ఒక్కో యూనిట్రూ. 2 లక్షల నుంచి 6 లక్షల వరకు విద్యుత్ బిల్లులు బకాయి పడ్డాయి. ఇబ్బందులను ఎదుర్కొంటూ పరిశ్రమలు నడిపిస్తే నెలకు రూ.లక్షకు పైగా ఒక్కో యూనిట్పై నష్టం వస్తోందని నిర్వాహకులు చెబుతున్నారు. బతుకమ్మ చీరల ఆర్డర్లు వస్తాయని నమ్మి ప్రైవేట్ఆర్డర్లన్నీ రద్దు చేసుకున్నామని.. ఇప్పుడు పరిశ్రమలు మూతపడే పరిస్థితి వచ్చిందని ఆవేదన వ్యక్తం చేస్తున్నారు.
సగం ధరకే సాంచాలు అమ్ముకుంటున్రు
సిరిసిల్లలో పవర్లూంస్ అప్గ్రేడేషన్లో భాగంగా టెక్స్టైల్ పార్క్లో రాపియర్స్ఒక్కోటి రూ.4.50 లక్షలకు పైగా వెచ్చించి కొనుగోలు చేశారు. ఇప్పుడు పరిశ్రమలు నడవక, ఆర్థిక నష్టాలను తట్టుకోలేక చిన్నతరహా పరిశ్రమల యజమానులు ఆధునిక మరమగ్గాలను తమిళనాడుతోపాటు ఇతర రాష్ట్రాల వ్యాపారులకు అమ్ముకుంటున్నారు. రోజుకు రెండు నుంచి మూడు భారీ వెహికల్స్లో ఈ మరమగ్గాలు తరలిపోతున్నాయి. 112 యూనిట్లకు గాను కేవలం 30 యూనిట్లే ప్రస్తుతం రన్అవుతున్నాయి. పరిశ్రమలు మూతపడితే కార్మికుల ఉపాధిపై దెబ్బ పడి రోడ్డున పడే ప్రమాదం ఉందని కార్మిక సంఘాల నాయకులు పేర్కొంటున్నారు.
పరిశ్రమను ఆదుకోవాలె
మంత్రి కేటీఆర్పైనే సిరిసిల్ల టెక్స్టైల్ పార్క్మనుగడ ఆధారపడి ఉంది. విద్యుత్రీయింబర్స్మెంట్ఇప్పించడంతోపాటు నష్టాల్లో కూరుకుపోయిన యూనిట్లను ఆదుకోవాల్సిన అవసరం ఉంది. బతుకమ్మ చీరల ఆర్డర్లు పునరుద్ధరించాలి. పార్క్పై సుమారు 2,500 మంది కార్మికులు ఆధారపడటమే కాకుండా అప్పులు చేసి యజమానులు పెట్టుబడులు పెట్టారు. మంత్రి కేటీఆర్ టెక్స్టైల్ పార్క్ యూనిట్లపై దయ చూపి ఆర్థిక సంక్షోభం నుంచి గట్టెక్కించాలి.
- అన్నల్దాస్ అనిల్, టెక్స్టైల్ పార్క్యజమానుల సంఘం అధ్యక్షుడు, సిరిసిల్ల
ఏటా 50 లక్షల మీటర్ల ఆర్డర్లు
ఏటా రూ. 300 కోట్ల బతుకమ్మ చీరల ఆర్డర్లను సర్కారు సిరిసిల్ల పవర్లూంస్కు ఇస్తోంది. ఇందులో రూ. 15 కోట్ల విలువైన ఆర్డర్ రాజన్న సిరిసిల్ల జిల్లా కేంద్రం టెక్స్టైల్ పార్క్లోని యూనిట్ల ద్వారా చేస్తున్నారు. గత మూడేండ్లుగా టెస్కో ద్వారా ప్రభుత్వం ఇలా 50 లక్షల మీటర్ల బతుకమ్మ చీరల ఆర్డర్ ఇస్తోంది. కానీ ఈ ఏడాది మాత్రం టెక్స్టైల్ పార్క్కు బతుకమ్మ చీరల ఆర్డర్లు రద్దు చేశారు. దీనికి తోడు ప్రధానంగా విద్యుత్చార్జీల భారం పరిశ్రమలపై పడడంతో తీవ్ర సంక్షోభంలో కూరుకుపోయాయి.
