బషీర్బాగ్, వెలుగు: ఆర్మీ అధికారి పేరిట ఫ్లాట్ రెంట్కు తీసుకుంటామని చెప్పి ఓ గృహిణిని సైబర్ చీటర్స్ మోసగించారు. హైదరాబాద్ సైబర్ క్రైమ్ ఏసీపీ శివమారుతి వివరాల ప్రకారం.. సికింద్రాబాద్ కు చెందిన 40 ఏళ్ల మహిళ తన ఫ్లాట్ను రెంట్కు ఇవ్వడానికి QUIKR యాప్లో పోస్ట్ చేసింది. గుర్తు తెలియని వ్యక్తి ఆమెకు కాల్ చేసి, తాను ఆర్మీ అధికారిని అని పరిచయం చేసుకున్నాడు. ఫ్లాట్ రెంట్కు తీసుకుంటానని, అందుకు సంబంధించిన ప్రాసెస్ కోసం ఆర్మీకి సంబంధించిన అకౌంటెంట్ సంప్రదిస్తాడని తెలిపాడు.
అనంతరం ఫోన్ చేసిన స్కామర్ తనను ఆర్మీ అకౌంటెంట్గా పరిచయం చేసుకొని, ఆర్మీ నిబంధనల మేరకు ప్రాసెస్ రివర్సల్ మోడ్ ఉంటుందని తెలిపాడు. అందుకు తొలుత రూ.5 పంపించమని బాధితురాలికి తెలిపి, ఆమె పంపిన తరువాత ఆ డబ్బును తిరిగి ఆమె అకౌంట్కు పంపించాడు. ఆ తర్వాత మరి కొంత నగదును బాధిత మహిళ బదిలీ చేసింది. కానీ, ఆ డబ్బులు తిరిగి ఆమెకు క్రెడిట్ కాలేదు. ప్రాసెస్ నిదానంగా చేయడం కారణంగా డబ్బులు క్రెడిట్ కాలేదని స్కామర్స్ తెలిపాడు.
కోల్పోయిన డబ్బులు తిరిగి చెల్లిస్తామని నమ్మిస్తూ , ఆమె అకౌంట్ను ఖాళీ చేశారు. తిరిగి స్కామర్స్ కు మహిళ కాల్ చేయడంతో.. ఆమె అకౌంట్లో డబ్బులు లేకపోవడం వల్ల రివర్సల్ మోడ్ కావడం లేదని చెప్పారు. దీంతో ఆమె తెలిసిన వల్ల దగ్గర అప్పు చేసి డబ్బులను మరల స్కామర్స్ కు పంపించింది. ఆ తర్వాత స్కమార్లు స్పందించకపోవడంతో మోసపోయానని గ్రహించిన బాధితురాలు మొత్తం రూ. 1,30,980 లను పోగొట్టుకున్నట్లు సైబర్ క్రైమ్ పోలీసులకు ఆన్లైన్ లో ఫిర్యాదు చేసింది.
