తల్లీ బిడ్డల ప్రేమకు మించినది ఏదీ ఉండదు. పిల్లల గురించి తల్లికి తెలిసినంతగా మరెవరికీ తెలియదు. పిల్లలకు ఏమి ఇష్టమో.. వారికి కష్టమొస్తే ఎలా బుజ్జగించాలో కూడా ఆ తల్లికే తెలుసు. ఢిల్లీలో ఓ తల్లి అదే పని చేసింది. కాలు విరిగి ఇబ్బంది పడుతున్న తన కూతురికి తన ఆలోచనతో ట్రీట్మెంట్ చేయించింది.
ఢిల్లీకి చెందిన ఓ 11 నెలల పాప కాలు ఎముక ఫ్రాక్చర్ అయి ఇబ్బంది పడుతోంది. కానీ పసిపాప కావడంతో ట్రీట్మెంట్ కు సహకరించడం లేదు. ఏం చేయాలని ఆ తల్లి తల్లడిల్లిపోయింది. డాక్టర్లు కూడా ఆ చిన్నారికి ట్రీట్మెంట్ చేసేందుకు విఫలయత్నం చేశారు. బిడ్డ కష్టాన్ని ఎలా తొలగించాలని ఆ తల్లి బాగా ఆలోచించింది.
చివరంగా ఆ తల్లికి ఓ అద్భుతమైన ఆలోచన వచ్చింది. తన కూతురు బాగా ఇష్టపడే ఓ బొమ్మ ఉందని.. ముందు దానికి ట్రీట్మెంట్ చేయాలని డాక్టర్లకు చెప్పింది. డాక్టర్లు కూడా మొదట ఈ మాటలు విని ఆశ్చర్యపోయారు. కానీ ఆ తల్లి మనసు అర్థం చేసుకుని ఓకే చెప్పారు. హాస్పిటల్ లో చిన్నారి ఉన్న బెడ్ పైనే బొమ్మకు ఉత్తుత్తి ట్రీట్మెంట్ మొదలు పెట్టారు. బొమ్మ రెండు కాళ్లకు బ్యాండేజీ వేసి.. పైకి కట్టారు. ఇదంతా ఆ చిన్నారి గమనిస్తూనే ఉంది. బొమ్మ ట్రీట్మెంట్ అయిపోగానే.. చిన్నారి కి ట్రీట్మెంట్ మొదలుపెట్టారు. అప్పటి వరకు ఏడ్చి.. మారాం చేసిన ఆ చిన్నారి.. పక్కన బొమ్మకు చేసినట్టుగానే తనకు చేస్తుండటంతో సైలెంట్ గా ఉండిపోయింది. ఒక రోజు రెండు రోజులు కాదు.. ఇప్పటికీ వారం రోజులు దాటింది. కాళ్లు పైకి కట్టేసినా ఏ మాత్రం ఏడవకుండా ట్రీట్మెంట్ కు సహకరిస్తోంది. పక్కనే తనలాగే కాళ్లకు బ్యాండేజీతో ఉన్న బొమ్మతో ఆడుకుంటోంది. మరో వారం రోజుల్లో చిన్నారి పూర్తిగా కోలుకుంటుందని డాక్టర్లు చెబుతున్నారు.
చిన్నారికి ట్రీట్మెంట్ ఎలా చేయాలో తెలియక మొదట తల పట్టుకున్న డాక్టర్లు ఆ తల్లికి వచ్చిన ఆలోచనకు హ్యాట్సాఫ్ చెబుతున్నారు. డాక్టర్లైన తమకే అలాంటి ఆలోచన రాలేదని.. కానీ ఓ మధ్య తరగతి మహిళ అయినా.. ఆ పాప తల్లికి ఇలా ట్రీట్మెంట్ చేయాలనే ఆలోచన రావడం చాలా గ్రేట్ అంటున్నారు.
