తెలంగాణలో న్యాయవాదుల భద్రతకు సంబంధించి రాష్ట్ర ప్రభుత్వం అత్యంత కీలక నిర్ణయం తీసుకుంది. ఎంతో కాలంగా లాయర్లు ఎదురుచూస్తున్న తెలంగాణ అడ్వకేట్స్ ప్రొటెక్షన్ యాక్ట్ (న్యాయవాదుల రక్షణ చట్టం) అమలుకు అధికారిక నోటిఫికేషన్ విడుదల చేసింది. ఈ రోజు అంటే జూన్ 2 నుంచే ఈ చట్టం రాష్ట్రవ్యాప్తంగా అమల్లోకి వచ్చినట్లు ప్రభుత్వం స్పష్టం చేసింది.
ఈ మేరకు న్యాయ శాఖ అధికారిక ఉత్తర్వులను జారీ చేసింది. గవర్నర్ పేరుతో విడుదలైన ఈ నోటిఫికేషన్ను గెజిట్లో ప్రచురించాల్సిందిగా ప్రభుత్వం ఆదేశించింది. ఇటీవల కాలంలో న్యాయవాదులపై జరుగుతున్న దాడులు, బెదిరింపులు, వేధింపులను అరికట్టడమే లక్ష్యంగా ఈ ప్రత్యేక చట్టాన్ని తీసుకువచ్చారు.
ఈ కొత్త చట్టం అమలుతో న్యాయవాదుల హక్కులకు, వారి వృత్తిపరమైన భద్రతకు మరింత బలం చేకూరనుంది. ఇకపై లాయర్లపై ఎలాంటి దాడులకు పాల్పడినా ఈ చట్టం ప్రకారం కఠిన చర్యలు ఉంటాయని ప్రభుత్వం హెచ్చరించింది. ప్రభుత్వ నిర్ణయం పట్ల న్యాయవాద సంఘాలు హర్షం వ్యక్తం చేస్తున్నాయి.
