- కాంగ్రెస్ నుంచి పోటీకి డీకే అరుణ డబ్బులు అడిగారు: వంశీచంద్ రెడ్డి
హైదరాబాద్, వెలుగు : మాజీ మంత్రి డీకే అరుణ అవకాశవాద రాజకీయాలకు మారుపేరు అని కాంగ్రెస్ వర్కింగ్ కమిటీ ప్రత్యేక ఆహ్వానితుడు వంశీచంద్ రెడ్డి విమర్శించారు. ఎంఐఎం అధినేత అసదుద్దీన్ ఒవైసీ పిలిచినా ఆయన పార్టీలో అరుణ చేరిపోతారన్నారు. శుక్రవారం గాంధీభవన్లో మీడియాతో వంశీచంద్ మాట్లాడారు. 2019లో రూ.15 కోట్లు ఇస్తే కాంగ్రెస్ నుంచి మహబూబ్నగర్ ఎంపీగా పోటీ చేస్తానంటూ డీకే అరుణ చెప్పారని ఆరోపించారు. అరుణ డబ్బులు అడిగిందని చెప్పేందుకు తాను ఏ రామ మందిరంలోనైనా ప్రమాణానికి సిద్ధమన్నారు. ఈ నెల 28న ఉదయం 11 గంటలకు మహబూబ్నగర్ టీచర్స్ కాలనీలోని రామ మందిరానికి వస్తానని సవాల్ విసిరారు. అప్పుడు అసలైన రామభక్తులు ఎవరో తేలుతుందన్నారు.
