నైట్ఫ్రాంక్ రిపోర్టు వెల్లడి
న్యూఢిల్లీ: గత 30 నెలల్లో టాప్ 8 సిటీలలో కొత్తగా 16 మాల్స్ లాంఛయినట్లు నైట్ఫ్రాంక్ రిపోర్టు తెలిపింది. ఈ మాల్స్ 15.5 మిలియన్ చదరపు అడుగుల ప్లేస్లో ఏర్పాటయినట్లు పేర్కొంది. ఓవైపు కరోనా మహమ్మారి ఎఫెక్ట్ ఉన్నప్పటికీ ఇన్ని కొత్త మాల్స్ లాంఛ్ అవడం విశేషమని వివరించింది. థింక్ ఇండియా–థింక్ రిటెయిల్ 2022 పేరిట ఒక రిపోర్టును నైట్ఫ్రాంక్ తీసుకొచ్చింది. కొవిడ్19కి ముందు అంటే డిసెంబర్ 2019 నాటికి దేశంలో 255 మాల్స్ ఉన్నాయి. అహ్మదాబాద్, బెంగళూరు, చెన్నై, హైదరాబాద్, కోల్కత, ముంబై, ఎన్సీఆర్, పుణె సిటీలలో 77.4 మిలియన్ చదరపు అడుగుల విస్తీర్ణంలో ఈ మాల్స్ ఏర్పాటయ్యాయి. 2022 జూన్ చివరి నాటికి (అంటే మొదటి ఆరు నెలల్లో) మాల్స్ విస్తీర్ణం మొత్తం 92.9 మిలియన్ చదరపు అడుగులకి చేరినట్లు రిపోర్టు తెలిపింది. దేశంలో ఇప్పుడు 271 మాల్స్ ఆపరేషన్స్లో ఉన్నట్లు పేర్కొంది. మొత్తం మాల్స్లో ఎన్సీఆర్ వాటా 34 శాతమని, ముంబై వాటా 18 శాతం, బెంగళూరు వాటా 17 శాతమని వివరించింది. రియల్ ఎస్టేట్ సెక్టార్ మెచ్యూర్ అయిందని, చిన్న సైజు డెవలప్మెంట్ ప్రాజెక్టులలోనూ గ్రేడ్ ఏ మాల్స్ ఏర్పాటవడమే దీనికి నిదర్శనమని నైట్ఫ్రాంక్ ఇండియా మేనేజింగ్ డైరెక్టర్ శిశిర్ బైజాల్ చెప్పారు. భవిష్యత్లో రిటెయిల్ రియల్ ఎస్టేట్కు మంచి గ్రోత్ వస్తుందని, రీట్స్(రియల్ ఎస్టేట్ ఇన్వెస్ట్మెంట్ ట్రస్ట్) సహా పెట్టుబడి అవకాశాలు మెరుగుపడతాయని ఆయన పేర్కొన్నారు.
ఏ గ్రేడ్ మాల్స్ 39 శాతమే...
మన దేశంలోని మొత్తం మాల్స్లో 39 శాతం మాత్రమే ఏ గ్రేడ్ మాల్స్గా గుర్తింపు పొందినట్లు నైట్ఫ్రాంక్ రిపోర్టు వెల్లడించింది. 36 మిలియన్ చదరపు అడుగుల గ్రాస్ లీజింగ్ ఏరియా ఉంటే వాటిని గ్రేడ్ ఏ మాల్స్గా పరిగణిస్తారు. టాప్ 8 సిటీలలోనూ కలిపి 52 గ్రేడ్ ఏ మాల్స్ ఉన్నట్లు రిపోర్టు తెలిపింది. గ్రేడ్ బీ కేటగిరీలో మొత్తం 94 మాల్స్, గ్రేడ్ సీ కేటగిరీలో 125 మాల్స్ ఉన్నాయి. దేశంలో మాల్స్ డెవలప్ చేసే డెవలపర్ల సంఖ్య 33కి తగ్గిపోయిందని తెలిపింది. 2010 కంటే ముందు 120 మంది దాకా రిటెయిల్ రియల్ ఎస్టేట్ డెవలపర్లు ఉండేవారని వెల్లడించింది.
మాల్స్ సేల్స్ 29 శాతం పెరుగుతయ్..
దేశంలోని షాపింగ్ మాల్స్ సేల్స్ 29 శాతం గ్రోత్తో 2028 నాటికి 39 బిలియన్ డాలర్ల మార్కును దాటుతాయని కూడా నైట్ఫ్రాంక్ రిపోర్టు అంచనా వేసింది. కన్జంప్షన్ పెరగడంతోపాటు, కొత్త మాల్స్నూ లెక్కలోకి తీసుకుని ఈ అంచనా వేసినట్లు వివరించింది. టాప్ 8 సిటీలలో ఆర్గనైజ్డ్ రిటెయిల్ సేల్స్ఏటా 17 శాతం చొప్పున పెరిగి 2028 నాటికి ఏకంగా 136 బిలియన్ డాలర్లవుతాయని కూడా నైట్ఫ్రాంక్ రిపోర్టు అంచనా వేస్తోంది. రాబోయే ఆరేళ్లలో కొత్తగా 50–55 మిలియన్ చదరపు అడుగుల ప్లేస్లో మాల్స్ రానున్నట్లు నైట్ఫ్రాంక్ డైరెక్టర్ వివేక్ రాఠి చెప్పారు.
