సోలార్ కరెంట్.. సూర్యుడున్నప్పుడు మాత్రమే తయారవుతుంటుంది. రాత్రిపూట కరెంట్ తయారు కాదు. మరి, ఆ రాత్రి కూడా సోలార్ పవర్ తయారైతే ఎట్లుంటది? సూపర్ కదూ! దాన్ని సాధ్యం చేసి చూపించారు అశ్వత్ రమణ్ అనే ఇండియన్ సైంటిస్టు. అమెరికాలోని యూనివర్సిటీ ఆఫ్ కాలిఫోర్నియాలో పనిచేస్తున్న ఆయన, రాత్రి కూడా కరెంట్ను తయారు చేసేలా సోలార్ పానెళ్లకు మరింత శక్తినిచ్చే ఓ పరికరాన్ని కనిపెట్టారు. దాన్ని థర్మోఎలక్ట్రిక్ జనరేటర్గా పిలుస్తున్నారు. దాన్ని స్టాన్ఫోర్డ్, కాలిఫోర్నియా యూనివర్సిటీల రూఫ్టాప్లపై పరీక్షించారు. అందులో సక్సెస్ అయ్యారు. ఈ పరికరంలో పాలీస్టైరీన్ షెల్ ఉంటుంది. దానిపై రేడియేషన్ ప్రభావం ఉండకుండా అల్యూమినియం రేకుతో కవరింగ్ చేశారు.
వాతావరణంలోని వేడిని తీసుకుని రాత్రిపూట ఆకాశంలోకి పంపించేలా ఆ పరికరానికి ఓ నల్లటి ఎమిటర్ను పెట్టారు. ఆ పరికరం పనిచేస్తుందో లేదో తెలుసుకునేందుకు ఓ టేబుల్పై పెట్టారు. పరికరానికి ఓ ఎల్ఈడీ బల్బును అటాచ్ చేశారు. దాంతోపాటు వోల్టేజ్ బూస్టర్ కన్వర్టర్నూ అటాచ్ చేశారు. బల్బును పరికరం వెలిగించింది. ఆరు గంటల్లో 25 మిల్లీ వాట్ల కరెంట్ను తయారు చేసింది. ప్రస్తుతం ఇది చిన్న సైజులో తయారు చేసిన పరికరమేనని, పెద్ద సైజుల్లో తయారు చేస్తే ఫలితాలు మరింత మంచిగా వస్తాయని రమణ్ చెబుతున్నారు.