గాంధీనగర్: భారత న్యాయవ్యవస్థలో కేసుల విచారణ జాప్యం అనేది తీవ్రమైన సమస్య. ఇందుకు నిదర్శనమే లేటేస్ట్గా అలహాబాద్ హైకోర్టు ఇచ్చిన తీర్పు. మర్డర్ కేసులో 100 ఏండ్ల వృద్ధుడికి 42 సంవత్సరాల తర్వాత న్యాయం దక్కింది. హత్య కేసులో వృద్ధుడిని కోర్టు నిర్దోషిగా ప్రకటించింది. ఈ జడ్జిమెంట్ దేశవ్యాప్తంగా మరోసారి న్యాయ వ్యవస్థలో జాప్యం గురించి చర్చకు దారి తీసింది.
వివరాల ప్రకారం.. 1982, ఆగస్టు 9న హమీర్పూర్ జిల్లాలో గున్వా అనే వ్యక్తి హత్యకు గురయ్యాడు. భూ వివాదం నేపథ్యంలో ప్రత్యర్థులు అతడిని కాల్చి చంపారు. ఈ కేసులో మైకు, ధనిరామ్, సత్తిదిన్ను 1984లో హమీర్పూర్లోని సెషన్స్ కోర్టు దోషులుగా తేల్చి జీవిత ఖైదు విధించింది. ధనిరామ్, సత్తిదిన్ ఈ తీర్పును అలహాబాద్ హైకోర్టులో సవాల్ చేశారు. పిటిషన్ పెండింగ్లో ఉండటంతో హైకోర్టు వీరికి షరతులతో కూడిన బెయిల్ మంజూరు చేసింది.
ALSO READ : అయ్యో పాపం అమ్మాయిని రక్షిద్దామనుకున్నడు..
కేసు విచారణ పెండింగ్లో ఉండగానే అనారోగ్యంతో సుత్తిదిన్ మరణించాడు. ధనిరామ్ ఒక్కడే మిగిలిపోయాడు. ఈ పిటిషన్పై అలహాబాద్ హైకోర్టులో దాదాపు 42 ఏళ్ల సుదీర్ఘకాలం పాటు విచారణ జరిగింది. తాజాగా 2026, ఫిబ్రవరి 4వ తేదీన అలహాబాద్ హైకోర్టు ఈ కేసులో తుది తీర్పు వెల్లడించింది. 1984లో హమీర్పూర్లోని సెషన్స్ కోర్టు ధనిరామ్కు విధించిన జీవిత ఖైదు తీర్పును జస్టిస్ చంద్రధరి సింగ్, సంజీవ్ కుమార్లతో కూడిన డివిజన్ బెంచ్ కొట్టివేసింది. ధనిరామ్ను నిర్దోషిగా ప్రకటించింది.
