విలియంసన్ ఫ్యాన్స్, న్యూజిలాండ్ క్రికెట్ జట్టుకు గుడ్ న్యూస్. ఏడు నెలల తర్వాత అంతర్జాతీయ క్రికెట్ లో రీ ఎంట్రీ ఇస్తున్నాడు. ఇంగ్లాండ్ తో జరగనున్న వన్డే సిరీస్ కోసం న్యూజిలాండ్ ప్రకటించిన వన్డే స్క్వాడ్ లో విలియంసన్ కు చోటు దక్కింది. సోమవారం (అక్టోబర్ 14) న్యూజిలాండ్ క్రికెట్ ప్రకటించిన 14 స్క్వాడ్ లో విలియంసన్ కు చోటు దక్కింది. ఈ ఏడాది ప్రారంభంలో ఇండియాపై ఛాంపియన్స్ ట్రోఫీ ఫైనల్ ఆడిన కేన్.. 7 నెలల తర్వాత ఇదే తొలి అంతర్జాతీయ మ్యాచ్ కావడం విశేషం.
మూడు ఫార్మాట్ లు ఆడుతున్న విలియంసన్ జట్టులోకి రీ ఎంట్రీ ఇవ్వడం కివీస్ జట్టులో ఆనందాన్ని నింపుతుంది. స్క్వాడ్ విషయానికి వస్తే ఆగస్టులో జింబాబ్వేతో జరిగిన తొలి టెస్ట్ సందర్భంగా గాయపడిన బౌలింగ్ ఆల్ రౌండర్ నాథన్ స్మిత్ కూడా కోలుకొని వన్డే జట్టులోకి వచ్చాడు. ఎడమ భుజం గాయంతో బాధపడుతున్న టెస్ట్ కెప్టెన్ టామ్ లాథమ్ కూడా వన్డే జట్టులో స్థానం దక్కింది. "కేన్, నాథన్ వారి వారి గాయాలు అధిగమించడానికి చాలా కష్టపడాల్సి వచ్చింది". అని వీరిద్దరి కంబ్యాక్ పై ప్రధాన కోచ్ రాబ్ వాల్టర్ అన్నారు.
ఇంగ్లాండ్ తో వన్డేలకు న్యూజిలాండ్ జట్టు:
మిచెల్ సాంట్నర్ (కెప్టెన్), మైఖేల్ బ్రేస్‌వెల్, మార్క్ చాప్‌మన్, డెవాన్ కాన్వే, జాకబ్ డఫీ, జాక్ ఫౌల్క్స్, మాట్ హెన్రీ, కైల్ జామిసన్, టామ్ లాథమ్ (వికెట్ కీపర్), డారిల్ మిచెల్, రాచిన్ రవీంద్ర, నాథన్ స్మిత్, కేన్ విలియమ్సన్, విల్ యంగ్
సెంట్రల్ కాంట్రాక్ట్ వద్దనుకున్న విలియంసన్:
న్యూజిలాండ్ క్రికెట్ బోర్డు సెంట్రల్ కాంట్రాక్ట్ కేన్ వద్దనుకున్నారు. ఒకవేళ ఈ కాంట్రాక్ట్ లిస్ట్ లో ఉంటే జాతీయ జట్టు తరపున రెగ్యులర్ ప్లేయర్ గా ఆడాల్సి ఉంటుంది. విలియంసన్ మాత్రం అంతర్జాతీయ టీ20 క్రికెట్ లీగ్ లు ఆడాలనే తన కోరికను తెలిపాడు. సెంట్రల్ కాంట్రాక్ట్ లిస్ట్ లో లేకపోయినా ప్రధాన టోర్నీలకు అందుబాటులో ఉంటానని గతంలోనే కేన్ స్పష్టం చేశాడు. విలియంసన్ టీ20 వరల్డ్ కప్ 2026 ఆడతాని ప్రకటించడంతో ఫ్యాన్స్ పండగ చేసుకుంటున్నారు. పని భారాన్ని దృష్టిలో ఉంచుకొని రానున్న ఐసీసీ టోర్నీలో ఫిట్ గా ఉండేందుకు తాను ఈ నిర్ణయం తీసుకున్నానని ఈ కివీస్ దిగ్గజం చెప్పినా ద్వైపాక్షిక సిరీస్ పై ఆసక్తి చూపించడం లేదు.
న్యూజిలాండ్ కు కేన్ విలియమ్సన్ సక్సెస్ ఫుల్ కెప్టెన్. ఎన్నో ఐసీసీ టోర్నీల్లో కివీస్ కు నాయకత్వం వహించాడు. 2021 లో ఇండియాపై వరల్డ్ టెస్ట్ ఛాంపియన్ షిప్ టైటిల్ గెలిపించిన పరిమిత ఓవర్ల క్రికెట్ లో ఎన్నో సార్లు ఫైనల్ కు తీసుకెళ్లాడు. 2024 టీ20 వరల్డ్ కప్ లో పేలవ ప్రదర్శన దృష్ట్యా పరిమిత ఓవర్ల ఫార్మాట్‌లో కెప్టెన్సీ నుంచి తప్పుకొంటున్నట్లు ప్రకటించారు. 2024-25 కాలానికి బోర్డు సెంట్రల్ కాంట్రాక్టును కూడా వదులుకున్నాడు. విలియమ్సన్ 91 వన్డేలు, 75 టీ20 మ్యాచ్‌లకు కివీస్‌కు కెప్టెన్‌గా వ్యవహరించాడు. ఈ కాలంలో కివీస్ జట్టు 47 వన్డేలు, 39 టీ20 మ్యాచ్‌లు గెలిచింది.
