బాలీవుడ్ ప్రేమజంట సిద్దార్థ్, కియారాల వివాహ వేడుకలు వైభవంగా జరుగుతున్నాయి. రాజస్థాన్లోని జైసల్మీర్లోని సూర్యగఢ్ ప్యాలెస్లో వీరిద్దరూ వివాహ బంధంలో అడుగుపెట్టనున్నారు. అయితే పెళ్లికి వీరు పెడుతున్న ఖర్చు చూసి అభిమానులు షాక్ అవుతున్నారు. ఈ సూర్యగఢ్ ప్యాలెస్ గురించి తెలుసుకోవడానికి ఆసక్తి చూపిస్తున్నారు. అంతగా ఖర్చు పెట్టేంత ఏముంది అనుకుంటున్నారు. రాజస్థాన్లోని ఈ సూర్యగఢ్ ప్యాలెస్ రాయల్ వెడ్డింగ్స్కు నిలయం. అతిథులకు విలాసవంతమైన హోటల్ గదులు, బెడ్‌రూమ్‌లు, పెద్ద తోటలు, ఒక కృత్రిమ సరస్సు, ఒక వ్యాయామశాల, ఒక ఇండోర్ స్విమ్మింగ్ పూల్, విల్లాలు, 2 పెద్ద రెస్టారెంట్‌లు ఉన్నాయి. అయితే ప్రస్తుతం కియారా, సిద్దార్థ్ వెడ్డింగ్ కారణంగా ఈనెల 11 వరకు హోటల్ బుకింగ్లకు ఈ ప్యాలెస్ అందుబాటులో లేదని ప్యాలెస్ అధికారులు వెల్లడించారు.
సుమారు 200 మంది అతిథులతో జరిగే వివాహ వేడుకలకు సుమారు రూ.1.75 కోట్లు ఖర్చు అవుతుంది. ఈ మొత్తంలో అల్పాహారం, మధ్యాహ్న భోజనం, డిన్నర్ ఉంటాయి. అయితే ఇందులో ఆల్కహాల్ ఛార్జీలు ఉండవు. ఆల్కహాల్ వంటివి కూడా ఏర్పాటు చేస్తే అందుకు అదనంగా ఖర్చు అవుతుంది. ఈ ప్యాలెస్లో ఒక్కరోజు బస చేస్తే రూ.80,000 వరకు ఛార్జ్ చేయనున్నారు. ట్యాక్స్ వంటివి అదనంగా చెల్లించాల్సి ఉంటుంది. దాదాపు 65 ఎకరాల విస్తీర్ణంలో ఉన్న ఈ హోటల్ నిర్మాణాన్ని పసుపు రాళ్లను ఉపయోగించి అద్భుతంగా తీర్చిదిద్దారు. ఇదిలా ఉంటే సూర్యగఢ్ ప్యాలెస్లో మూడు రోజులుగా సిద్ధార్థ్, కియారాల వివాహ వేడుకలు జరుగుతున్నాయి. పెళ్లి వేదికను పింక్ లైట్లతో అందంగా అలంకరించారు. ఇప్పటికే మెహందీ, సంగీత్ వేడుకలకు సంబందించిన ఫోటోలు, వీడియోలు సోషల్ మీడియాలో వైరల్ అవుతున్నాయి.
