హైదరాబాద్, వెలుగు: న్యాయమైన డిమాండ్ల కోసం శాంతియుతంగా ఆందోళన చేస్తున్న నిరుద్యోగులపై లాఠీచార్జ్ చేయడం హేయమైన చర్యని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. ప్రజాస్వామ్యబద్ధంగా నిరసన తెలుపు తున్న అభ్యర్థులను అక్రమంగా అరెస్ట్ చేయడం ప్రభుత్వ నిరంకుశత్వానికి నిదర్శనమని మంగళవారం ఓ ప్రకటనలో పేర్కొన్నారు. నిరుద్యోగులను పోలీసులతో అణగదొక్కడమే కాంగ్రెస్ ప్రజా పాలననా? అని ప్రశ్నించారు. ఉద్యోగాల భర్తీ కోసం నోటిఫికేషన్లు జారీ చేయాలని హైద రాబాద్తోపాటు అన్ని వర్సిటీల్లోని విద్యార్థు లు డిమాండ్ చేస్తున్నా ప్రభుత్వం పట్టించుకోవడం లేదని ఆగ్రహం వ్యక్తం చేశారు.
ఎన్నికల ముందు ఏడాదిలో 2 లక్షల ప్రభుత్వ ఉద్యోగాలను భర్తీ చేస్తామని, 'మెగా నోటిఫికేషన్లు', 'జాబ్ క్యాలెండర్' అంటూ కూతలు కూసి యువతను మభ్యపెట్టి కాంగ్రెస్ అధికారంలోకి వచ్చిందని తెలిపారు. రాష్ట్రంలో 20 వేలకుపైగా పోలీస్ ఉద్యోగాలు ఖాళీగా ఉన్నా.. 5 వేల పోస్టులతో చేతులు దులుపుకోవాలనుకోవడం అన్యాయమన్నారు. కోచింగ్ సెంటర్లలో శిక్షణ తీసుకుంటున్న అభ్యర్థుల భవిష్యత్ను దృష్టిలో ఉంచుకుని 20 వేల పోలీస్ కానిస్టేబుల్ ఉద్యోగాలను భర్తీ చేయాలని డిమాండ్ చేశారు.
