పసి బిడ్డలకు నెలలు పెరుగుతున్న కొద్దీ ఆకలి పెరుగుతుంటుంది. కానీ, వాళ్లకి ఏది తినిపిస్తే మంచిది, ఏవి తినిపించకూడదు..అంటూ బోలెడు డౌట్స్ తల్లులకు. అయితే ఈ సందేహాలన్నీ న్యూట్రిషనిస్ట్ హేమప్రియ నటేశన్కి కూడా ఉన్నాయి. వాటికి జవాబు వెతుకుతూ .. ఓ ఫేస్బుక్ గ్రూపులో చేరిందీమె. ఆ గ్రూపులో ఉన్న తల్లులందరిదీ తనలాంటి పరిస్థితే అని తెలిశాక..యూట్యూబ్లో ‘ మై లిటిల్ మోప్పెట్’ అనే వంటల ఛానెల్ పెట్టింది. లక్షల్లో వ్యూస్.. ఆ ఇన్స్పిరేషన్తో తాను చేసిన స్పెషల్ రెసిపీలని ప్రొడక్ట్స్ గా మార్కెట్లోకి తీసుకొచ్చింది. ఆ వచ్చే డబ్బుతో ‘లిటిల్ మోప్పెట్ హార్ట్ ఫౌండేషన్’ పెట్టి పేద పిల్లలకి గుండె ఆపరేషన్లు చేయిస్తోంది.
హేమప్రియకి 2014లో కూతురు పుట్టింది. బిడ్డ పుట్టాక అందరు తల్లుల్లానే..వాళ్ల ఆరోగ్యానికి సంబంధించి బోలెడు ప్రశ్నలు, భయాలు వెంటాడాయి ఆమెని. న్యూట్రిషనిస్ట్ కావడం వల్ల ఫుడ్ గురించి అవేర్నెస్ ఉన్నప్పటికీ.. మరింత రీసెర్చ్ చేసింది. తన కూతురికి హెల్దీ ఫుడ్ ఇవ్వాలన్న ఆలోచనతో ఫేస్బుక్లో ‘పేరెంటింగ్ అండ్ మామ్’ అనే గ్రూప్లో కూడా చేరింది. ఆ గ్రూప్లో ఉన్న తల్లులంతా పిల్లలకి తినిపించే ఫుడ్ విషయంలో పడుతున్న టెన్షన్ చూసి, ఏ ఏజ్ పిల్లలకి ఎలాంటి ఫుడ్ పెట్టాలి? ఏ ఫుడ్ పెడితే హెల్దీ .. అన్న విషయాల గురించి అందరికీ చెప్పాలనుకుంది. తనలాంటి తల్లుల కోసం ‘మై లిటిల్ మోప్పెట్’ అనే యూట్యూబ్ ఛానెల్ మొదలుపెట్టింది. అప్పటికి తన బిడ్డ వయసు ఒక నెలే.
ఆ ఇన్స్పిరేషన్తో..
తల్లి, అత్త తయారుచేసే ట్రెడిషనల్ రెసిపీలన్నింటినీ యూట్యూబ్లో పెట్టడం మొదలుపెట్టింది హేమప్రియ. వాటిల్లో పందొమ్మిది రకాల మిల్లెట్స్తో తయారుచేసిన ‘సత్తుమావు’ మిక్స్ రెసిపీకి లక్షల్లో వ్యూస్ వచ్చాయి. రోజురోజుకి సబ్స్ర్కైబర్ల సంఖ్య పెరిగిపోయింది. చాలామంది ఈ రెసిపీలని తయారుచేసి మార్కెట్లోకి తీసుకురమ్మని అడిగారు. దాంతో పిల్లలకి న్యూట్రిషన్ ఫుడ్ అందించాలని డిసైడ్ అయింది హేమ. అది కూడా పూర్తిగా ఆర్గానిక్ పద్ధతిలో. ఉద్యోగం మానేసి మరీ దానికోసం గ్రౌండ్ వర్క్ మొదలుపెట్టింది. తన తల్లి సాయంతో తయారుచేసిన హెల్దీ డ్రింక్ పౌడర్స్ని ‘ మై లిటిల్ మోప్పెట్’ పేరుతోనే మార్కెట్లో రిలీజ్ చేసింది.
ఫౌండేషన్ నడుపుతోంది
నోటి మాట ద్వారానే రోజురోజుకి కస్టమర్స్ సంఖ్య పెరుగుతూ పోయింది. నెలలు గడిచే కొద్దీ మరింత రీచ్ వచ్చింది. దాంతో విడిగా ఒక యూనిట్ పెట్టి, కొంతమందిని పనిలో పెట్టుకుంది. రాగి, ఖర్జూరంతో కుకీస్, ఎనర్జీ బార్స్, సిరియల్స్, మిల్లెట్స్తో నూడిల్స్, పాన్కేక్స్.. ఇలా అన్ని రకాల వెరైటీలు అమ్ముతోంది హేమప్రియ. అలాగే తన ఎక్స్పీరియెన్స్లని బ్లాగ్స్లో రాస్తోంది. అందులో రెసిపీలు, పిల్లల మీల్ ప్లాన్స్, బొమ్మలు, యాక్టివిటీల గురించి చెప్తుంది. తల్లిదండ్రుల ప్రశ్నలకి జవాబులిస్తోంది. భర్త డాక్టర్ గోపీతో కలిసి లిటిల్ మోప్పెట్ ఫౌండేషన్ నడుపుతోంది.
