ఖైరతాబాద్, వెలుగు: యాదవులు ప్రతిష్టాత్మకంగా నిర్వహించే సదర్ ఉత్సవాలకు అన్ని ఏర్పాట్లు చేస్తున్నామని ఖైరతాబాద్ సదర్ ఉత్సవాల నిర్వహణ కమిటీ చైర్మన్ మహేశ్ యాదవ్ అన్నారు. ఆదివారం ఖైరతాబాద్లోని మహంకాళి ఆలయంలో ఏర్పాటు చేసిన మీడియా సమావేశంలో ఆయన మాట్లాడుతూ.. సదర్ను రాష్ట్ర పండుగగా గుర్తించాలని డిమాండ్ చేశారు. ప్రతి ఏడాది సిటీలో సదర్ ఉత్సవాలు ఖైరతాబాద్ నుంచే మొదలవుతాయన్నారు.
ఈ నెల 26న ఖైరతాబాద్లో సదర్ ఉత్సవాలు ప్రారంభమవుతాయని.. చీఫ్ గెస్టులుగా మంత్రులు కేటీఆర్, తలసాని శ్రీనివాస్ యాదవ్, ఎమ్మెల్యే దానం నాగేందర్, బేవరెజెస్ చైర్మన్ గజ్జెల నాగేశ్, మేయర్ విజయలక్ష్మి, కార్పొరేటర్ విజయారెడ్డి హాజరవుతారన్నారు. అదే రోజు రాత్రి 7 గంటలకు బడా గణేశ్ ఏరియా నుంచి రైల్వే గేట్ వరకు దున్నరాజుల ప్రదర్శన ఉంటుందన్నారు. నాంపల్లి, పురానా పూల్తో పాటు సిటీలోని చాలా ప్రాంతాల నుంచి దున్నపోతులను ప్రదర్శనకు వస్తాయన్నారు. సమావేశంలో సదర్ ఉత్సవ కమిటీ సభ్యులు లక్ష్మణ్ యాదవ్, మధుకర్ యాదవ్, సుధాకర్, శ్రీనివాస్ యాదవ్, వినోద్ యాదవ్ పాల్గొన్నారు.
