హైదరాబాద్, వెలుగు: తెలంగాణ ప్రజలకిచ్చిన హామీల అమలుకు కట్టుబడి ఉన్నామని మంత్రి శ్రీధర్ బాబు స్పష్టం చేశారు. మేనిఫెస్టోలో ఇచ్చిన అన్నీ హామీలను నెరవేరుస్తామన్నారు. మాజీ మంత్రి హరీశ్ రావు కామెంట్లకు మంత్రి శ్రీధర్ బాబు సోమవారం కౌంటర్ ఇచ్చారు. పెన్షన్పై ఏపీ సీఎం చంద్రబాబు ఉత్తర్వులిచ్చారని, తెలంగాణలో ఎప్పుడు అమలు చేస్తారన్న హరీశ్రావు వ్యాఖ్యలపై శ్రీధర్ బాబు స్పందించారు. ‘‘రాష్ట్ర ప్రజల ఆలోచనలనే మేము అమలు చేస్తం. ఏపీ ప్రభుత్వ ఆలోచనలను కాదు”అని అన్నారు. చంద్రబాబును ఉదాహరణగా తీసుకున్నారంటేనే హరీశ్రావు పరిస్థితి ఏంటో అర్థం అవుతోందని ఎద్దేవా చేశారు. ‘‘పదేండ్ల పాటు మీరు ఆగం చేసిన ఆర్థిక వ్యవస్థను ఇప్పుడిప్పుడే సెట్ చేస్తున్నం. 3 నెలల పాటు కోడ్ మాకు అడ్డుగా వచ్చింది. కోడ్ ముగిసినప్పటి నుంచి హామీల అమలుకు కసరత్తు చేస్తున్నం. ఆగస్టు 15లోపే రుణమాఫీ పూర్తి చేస్తం’’ అని మంత్రి స్పష్టం చేశారు.
త్వరలోనే జాబ్ క్యాలెండర్
12 ఏండ్ల తర్వాత గ్రూప్ 1 పరీక్ష తామే నిర్వహించామని, త్వరలో జాబ్ క్యాలెండర్నూ రిలీజ్ చేస్తామని శ్రీధర్ బాబు ప్రకటించారు. ఆశా వర్కర్ల గురించి మాట్లాడే హక్కు హరీశ్రావుకు లేదన్నారు. బీఆర్ఎస్ హయాంలో ఆశా వర్కర్లను గుర్రాలతో తొక్కించారని మంత్రి గుర్తు చేశారు. పెద్దపల్లిలో అత్యాచార ఘటనపై విచారణ కొనసాగుతోందన్నారు. ఈ ఘటన జరగడం దురదృష్టకరమని, లా అండ్ ఆర్డర్ విషయంలో ప్రభుత్వం సీరియస్ గా ఉందని శ్రీధర్ బాబు వెల్లడించారు. మత ఘర్షణల విషయంలో సీరియస్గా ఉన్నామని చెప్పారు. వీటి వెనుక ఎవరున్నా వదిలిపెట్టేది లేదని ఆయన హెచ్చరించారు.
