గౌరవెల్లి ప్రాజెక్టు భూసేకరణను స్పీడప్ చేయండి..అధికారులకు మంత్రి ఉత్తమ్ ఆదేశాలు

•     జూన్ 2 లోగా నిధుల విడుదలకు హామీ
•     మంత్రి పొన్నం ప్రభాకర్ తో కలిసి రివ్యూ

హైదరాబాద్, వెలుగు: గౌరవెల్లి ప్రాజెక్టును ప్రాధాన్య ప్రాజెక్టుగా త్వరితగతిన పూర్తి చేసేందుకు ప్రభుత్వం కట్టుబడి ఉందని, భూసేకరణ స్పీడప్​ చేయాలని అధికారులను ఇరిగేషన్ మంత్రి ఉత్తమ్ కుమార్ రెడ్డి ఆదేశించారు. 1.06 లక్షల ఎకరాల ఆయకట్టుకు సాగు నీరందించే లక్ష్యంతో మొదలుపెట్టిన ఈ ప్రాజెక్టుకు పర్యావరణ అనుమతులతో పాటు న్యాయపరమైన చిక్కుల వల్ల పనులు ఆలస్యమవుతున్నాయన్నారు. ప్రాజెక్టుపై సోమవారం సెక్రటేరియెట్​లో మంత్రి పొన్నం ప్రభాకర్​తో కలిసి ఆయన రివ్యూ చేశారు.

1.41 టీఎంసీల సామర్థ్యంతో ప్రతిపాదించిన ఈ రిజర్వాయర్​ను.. అదనపు ఆయకట్టు కోసం 8.23 టీఎంసీలకు పెంచి ప్రభుత్వం ముందు అంచనాలను పెట్టామన్నారు. రైతులకు భూసేకరణ పరిహారం న్యాయబద్ధంగా అందిస్తామని, నిధుల మంజూరుకు ప్రభుత్వం రెడీగా ఉందన్నారు. జూన్ 2 నాటికి ఆ నిధులను విడుదల చేస్తామని, భూసేకరణను సకాలంలో పూర్తి చేయాలని కరీంనగర్, హనుమకొండ, సిద్దిపేట జిల్లాల కలెక్టర్లను ఆదేశించారు.

ప్రాజెక్టుపై విచారణ మరో రెండ్రోజుల్లో ఉందని, దానిని అధిగమించేందుకు అవసరమైన వ్యూహంతో సిద్ధంగా ఉండాలని అడ్వకేట్ జనరల్​ను ఆదేశించారు. భూసేకరణ వేగంగా పూర్తి చెయ్యాలని అధికారులను మంత్రి పొన్నం ప్రభాకర్ ఆదేశించారు. సీఎం రేవంత్ రెడ్డి నిర్దేశించిన విధంగా దేవాదుల, గౌరవెల్లి సహా నీటిపారుదల ప్రాజెక్టులకు సంబంధించిన భూసేకరణను పూర్తి చేయాలన్నారు.