మహారాష్ట్ర పబ్లిక్ సర్వీస్ కమిషన్ (MPSC) బేలాపూర్ కార్యాలయం.. ఏప్రిల్ 30, 2023 న జరిగిన నాన్‌గజెటెడ్ గ్రూప్ B, గ్రూప్ C సర్వీసెస్ జాయింట్ ప్రిలిమినరీ పరీక్షలో ఉత్తీర్ణత సాధించిన అభ్యర్థిపై కేసు నమోదైంది. పరీక్షా కేంద్రంలో అతను స్పై కెమెరాను ఉపయోగించడంతో ఈ కేసు ఫైల్ అయింది. బ్లూటూత్ స్పై కెమెరాలో వచ్చిన ప్రశ్నలకు సమాధానాలు ఇచ్చినందుకు మరో ఇద్దరిపై కూడా పోలీసులు కేసు నమోదు చేశారు.
ఎంపీఎస్సీ సీనియర్ అధికారి సుప్రియా లక్డే ఫిర్యాదు మేరకు బేలాపూర్ పోలీసులు విద్యార్థితో సహా ముగ్గురిపై మహారాష్ట్ర ప్రివెన్షన్ ఆఫ్ మాల్‌ప్రాక్టీసెస్ ఎట్ యూనివర్సిటీ, బోర్డు, ఇతర నిర్దేశిత పరీక్షల చట్టం, 1982 ఐటీ చట్టంలోని సంబంధిత సెక్షన్ల కింద కేసు నమోదు చేశారు. ఫిర్యాదు మేరకు, జాల్నా జిల్లాకు చెందిన ఆకాష్ భౌసింగ్ ఘునావత్ (27) అనే విద్యార్థిని ఏప్రిల్ 30న పూణెలోని జేఎస్‌పీఎం జయవంతరావు సావంత్ కాలేజ్ ఆఫ్ ఇంజినీరింగ్‌లో జరిగిన పరీక్షకు హాజరయ్యాడు. ఘునావత్ స్పై కెమెరాను ఉపయోగించి పరీక్ష హాల్ బయటకు ప్రశ్న పత్రాలను పంపారని, అతని మొబైల్‌లో సమాధానాలను అందుకున్నారని, తద్వారా అక్రమ మార్గాల్లో పరీక్షలో ఉత్తీర్ణత సాధించారని ఆరోపించారు.
ALSO READ : చంద్రబాబు రిమాండ్ పొడిగింపు : 24వ తేదీ వరకు విధిస్తూ తీర్పు
ముంబయి పోలీసులు కేసు నమోదు చేసిన నిందితుల్లో ఒకరిని జల్నా నివాసి శంకర్ చైన్‌సింగ్ జర్వాల్ (30)గా గుర్తించారు. నిందితులు చాలా మంది అభ్యర్థులకు స్పై కెమెరాను ఉపయోగించి పోటీ పరీక్షల్లో ఉత్తీర్ణత పొందేందుకు సహాయం చేశారని, మారుమూల ప్రాంతం నుంచి సమాధానాలు అందించారని పోలీసులు కనుగొన్నారు. 2023 ఏప్రిల్‌లో జరిగిన ఎంపీసీబీ పరీక్షలోనూ ఘునావత్ ఇదే తరహాలో ఉత్తీర్ణత సాధించినట్లు పోలీసులు గుర్తించారు. ముంబై పోలీసుల విచారణలో, పరీక్షకు హాజరయ్యే అభ్యర్థులు జీవన్ నైమానే అనే వ్యక్తికి స్పై కెమెరాను ఉపయోగించి ప్రశ్నపత్రాన్ని పంపినట్లు కనుగొన్నారు. ఆ తర్వాత ప్రశ్నపత్రాన్ని జర్వాల్.. అభ్యర్థి మొబైల్‌ నంబర్‌కు పంపారు.
