టెక్నాలజీ పెరుగుతున్నా కొద్దీ సైబర్ మోసాలు పెరుగుతూ ఉన్నాయి. దీంతో వాటిని పరిష్కరించేందుకు శిక్షణ పొందిన సైబర్ సెక్యూరిటీ నిపుణుల అవసరం చాలా ఏర్పడింది. ఫలితంగా వీరికి డిమాండ్ కూడా పెరిగింది. ఈ నేపథ్యంలో హైదరాబాద్‌లోని జవహర్‌లాల్ నెహ్రూ టెక్నలాజికల్ యూనివర్శిటీ (జేఎన్‌టీయు) సైబర్ వారియర్స్ కోసం కొత్తగా BTech CSE లో సైబర్ సెక్యూరిటీ ప్రోగ్రామ్ ను అందుబాటులోకి తీసుకువచ్చింది.
వచ్చే విద్యా సంవత్సరం నుంచి హైదరాబాద్‌లోని వర్సిటీ క్యాంపస్ కాలేజీలో ఈ కోర్సును ప్రత్యేకంగా అందించనున్నారు. సైబర్ క్రైమ్ కేసులను విజయవంతంగా ఛేదిస్తున్న తెలంగాణ పోలీసులకు చెందిన సైబర్ క్రైమ్ నిపుణులు ఇప్పుడు సైబర్ యోధులను రూపొందించడంలో విశ్వవిద్యాలయానికి సహాయం చేయనున్నారు.
JNTU, హైదరాబాద్, రాష్ట్ర పోలీసులతో అవగాహన ఒప్పందంపై సంతకం చేసింది. ఈ కోర్సు కోసం మూడో, నాల్గవ సంవత్సరంలో తరగతులు తీసుకోనున్నారు. నేర పరిశోధన సమయంలో ఉపయోగించే సాధనాలు, సాఫ్ట్‌వేర్‌లతో పాటు ప్రత్యక్ష ఉదాహరణలతో సైబర్ నేరాలను ఎలా గుర్తించాలో విద్యార్థులకు శిక్షణ ఇవ్వనున్నారు.
