- బట్టలు తీయించి యవతులు, మహిళల ఫొటోలు, వీడియోలు
- నిజామాబాద్ అయ్యప్ప స్కానింగ్సెంటర్లో ఆపరేటర్ వికృత చేష్టలు
- వాట్సాప్లో వారికి పంపి బ్లాక్మెయిల్, లైంగిక వేధింపులు
- నిందితుడు ప్రశాంత్ అరెస్ట్.. సెల్ఫోన్ స్వాధీనం
నిజామాబాద్, వెలుగు: స్కానింగ్సెంటర్కు వచ్చిన యువతులు, మహిళల పట్ల ఓ ఆపరేటర్ వికృత చేష్టలకు పాల్పడ్డాడు. స్కానింగ్ పేరుతో వారి బట్టలు విప్పించి సీక్రెట్గా ఫొటోలు, వీడియోలు తీశాడు. వాటిని వాట్సాప్కు పంపి బ్లాక్ చేయడంతోపాటు లైంగిక వేధింపులకు పాల్పడ్డాడు. ఈ ఘటన నిజామాబాద్లో కలకలం రేపింది. ఈ విషయాన్ని సీరియస్గా తీసుకున్న కలెక్టర్ రాజీవ్గాంధీ హనుమంతు విచారణకు ఆదేశించారు.
వివరాల్లోకెళితే, నగరంలోని అయ్యప్ప స్కానింగ్ సెంటర్లో ఆపరేటర్గా పని చేస్తున్న ప్రశాంత్.. స్కానింగ్ కోసం వచ్చే యువతులు, మహిళలను ఒంటిపై బట్టలు తీసేస్తేనే స్కానింగ్ పక్కాగా వస్తుందని నమ్మించి ఒప్పించేవాడు. అనంతరం పరదా చాటునుంచి సీక్రెట్గా సెల్ఫోన్ను రికార్డింగ్ మోడ్లో పెట్టి వీడియో షూట్ చేసేవాడు. దొంగచాటుగా ఫొటోలు తీసేవాడు. రిసెప్షన్ కౌంటర్లో వారి ఫోన్ నంబర్లు తీసుకొని, న్యూడ్ ఫొటోలు, వీడియోలు పంపేవాడు. సోషల్ మీడియాలో పోస్టు చేస్తానని డబ్బులు డిమాండ్ చేయడంతో పాటు లైంగికంగా వేధించేవాడు.
లింగ నిర్ధారణ టెస్ట్లు చేస్తానని యువతులను ట్రాప్ చేసేవాడు. పరువు పోతుందనే భయంతో బాధితులు సైలెంట్గా ఉన్నారు. అయితే, ఈ నెల 5న ఒక మహిళ స్కానింగ్ సెంటర్కు వెళ్లగా, ప్రశాంత్ ఆమె ఫోన్కు న్యూడ్ ఫొటోలు పంపించాడు. విషయం కుటుంబ సభ్యులకు తెలపడంతో వారు ప్రశాంత్ను చితకబాదారు. కాగా, స్కానింగ్ సెంటర్మేనేజ్మెంట్ వారిని బుజ్జగించి పంపించింది. ఈ విషయం ప్రజాసంఘాల ప్రతినిధులకు తెలియంతో వారు కలెక్టర్, సీపీ దృష్టికి తీసుకొచ్చారు.
సీపీ కల్మేశ్వర్, డీసీపీ శేషాద్రిరెడ్డి నేతృత్వంలో సీఐ శ్రీలతతో విచారణ చేయించి, నిజాలు తెలుసుకున్నారు. దాదాపు వంద మంది బాధిత మహిళలు ఆపరేటర్ ప్రశాంత్ వేధింపులు ఎదుర్కొన్నట్టు గుర్తించారు. 33 మందితో ప్రశాంత్ చేసిన చాటింగ్ను సేకరించారు. కలెక్టర్ రాజీవ్గాంధీ హనుమంతుకు ఈ విషయం తెలియడంతో యాక్షన్ తీసుకోవాలని డీఎంహెచ్వో తుకారాం రాథోడ్ను ఆదేశించారు.
దీంతో ఆయన సోమవారం రాత్రి 10 రోజుల్లో సంజాయిషీ ఇవ్వాలని స్కానింగ్ సెంటర్ మేనేజ్మెంట్కు నోటీసు పంపారు. పరారీలో ఉన్న ప్రశాంత్ను పోలీసులు గాలించి పట్టుకొని, అరెస్ట్ చేశారు. డేటా డిలీట్ చేసిన ఫోన్ను ప్రశాంత్ పోలీసులకు అప్పగించాడు. నిపుణుల సాయంతో ఫోన్ డేటా రికవరీ చేస్తున్న పోలీసులు, స్కానింగ్ సెంటర్లోని హార్డ్ డిస్క్ ను స్వాధీనం చేసుకున్నారు.
స్కానింగ్ సెంటర్పై విచారణకు కమిటీ: డీఎంహెచ్వో
అయ్యప్ప స్కానింగ్ సెంటర్ మేనేజ్మెంట్కు నోటీసులు జారీ చేశామని డీఎంహెచ్వో డాక్టర్ తుకారాం రాథోడ్ తెలిపారు. ఈ ఘటనపై పూర్తిస్థాయి విచారణ చేసేందుకు కమిటీని ఏర్పాటు చేశామని వెల్లడించారు. డాక్టర్లు అనుపమ, శ్రావణి, అంజన, లావణ్యతో కూడిన నలుగురు సభ్యుల కమిటీ ఈ ఘటనపై ఎంక్వైరీ చేస్తుందని చెప్పారు. ఏడు రోజుల్లో కమిటీ రిపోర్టు ఇవ్వాలని ఆదేశించినట్టు తెలిపారు. స్కానింగ్ సెంటర్ సంజాయిషీ, కమిటీ రిపోర్టు రెండింటినీ బేస్ చేసుకొని యాక్షన్ తీసుకుంటామని చెప్పారు.
