ఒంటి చేత్తో, ఒంటి కాలితో అయినా ఆడతా : విహారి

• నా ఆట కొంత మందికైనా స్ఫూర్తినిస్తే చాలు

న్యూఢిల్లీ: ఒంటి చేతితో ఆడినా, ఒంటి కాలితో ఆడినా, గెలుపు కోసమే తాను పోరాడతానని ఆంధ్ర రంజీ టీమ్​ కెప్టెన్​ హనుమ విహారి అన్నాడు. సెంచరీ చేసినా, చేయకపోయినా టీమ్​కు తన సహకారం అందాలని కోరుకుంటానని చెప్పాడు. ‘నేను గెలవడం కోసమే గ్రౌండ్​లోకి వెళ్తా. నా ప్రధాన లక్ష్యం కూడా అదే. పర్సనల్ మైల్​స్టోన్​ గురించి ఆలోచించను. టీమ్​లోకి రీ ఎంట్రీ కోసం భారీ స్కోర్లు చేయాలని అనుకోను. ఆంధ్రాకు ఆడినా, ఇండియాకు ఆడినా గెలవడమే నా లక్ష్యం. ఇందుకోసం ఒంటి చేత్తో అయినా, ఒంటి కాలితోనైనా బ్యాటింగ్​ చేస్తా’ అని విహారి పేర్కొన్నాడు. మధ్యప్రదేశ్​తో ముగిసిన రంజీ ట్రోఫీ క్వార్టర్​ఫైనల్లో ముంచేతి ఫ్రాక్చర్​కు గురైన విహారి.. రెండు ఇన్నింగ్స్​ల్లో ఒంటిచేత్తో బ్యాటింగ్​ చేసి అందరి ప్రశంసలు అందుకున్నాడు. ఈ నేపథ్యంలో అతను బ్యాటింగ్​ చేయడానికి దారితీసిన పరిస్థితులపై మాట్లాడాడు. ‘ఆవేశ్​ వేసిన షార్ట్​ బాల్​ నా ఎడమ ముంజేతిని బలంగా తాకింది. గతంలో ఎప్పుడూ అలాంటి నొప్పిని చూడలేదు. ఏదో జరిగిందని అప్పుడే అనుకున్నా. బ్యాటింగ్​ కంటిన్యూ చేయాలనుకున్నా.. బ్యాట్​పై గ్రిప్​ దొరక్కపోవడంతో పెవిలియన్​కు వెళ్లిపోయా. ఎక్స్​రే తీసిన తర్వాత చిన్న ఫ్రాక్చర్​ అయ్యిందని తేలింది. ఆరు వారాలు రెస్ట్​ అవసరమని డాక్టర్లు చెప్పారు. దీంతో చాలా నిరాశ చెందా. ఎందుకంటే 113 మ్యాచ్​ల తర్వాత  రంజీ ట్రోఫీలో నేను తొలి క్వార్టర్​ఫైనల్​ ఆడుతున్నా. ఇందుకోసం బాగా ప్రిపేర్​ కూడా అయ్యా’ అని విహారి తెలిపాడు.  

తప్పనిసరి పరిస్థితుల్లోనే..

తొలి రోజు మంచి స్కోరుతో ఉన్న తాము రెండో రోజు ఘోరమైన స్థితిలో పడిపోయామని విహారి చెప్పాడు. దీంతో తప్పనిసరి పరిస్థితుల్లో  బ్యాటింగ్​కు రావాల్సి వచ్చిందన్నాడు. ‘లెఫ్ట్​ హ్యాండ్​తో బ్యాటింగ్​ చేయొద్దని అనుకుని క్రీజులోకి వచ్చా. వచ్చే ముందు నా టీమ్‌‌‌‌మేట్స్‌‌‌‌ చేతికి ప్యాడ్స్​ కట్టారు. డ్రెస్సింగ్​ రూమ్​లో ఒకటి, రెండుసార్లు ప్రాక్టీస్​ చేసి క్రీజులోకి వచ్చా. టెన్నిస్​ బాల్​ క్రికెట్ ఆడేటప్పుడు కూడా నేను లెఫ్ట్​ హ్యాండ్​తో బ్యాటింగ్​ చేయలేదు. ఫస్ట్​ క్లాస్​ మ్యాచ్​లో ఇలాంటి పరిస్థితి వస్తుందని ఊహించలేదు. నా ఆట కొంత మందికైనా స్ఫూర్తినిస్తే చాలు. అదే నాకు సంతోషం. ఫిజియో కూడా నాకు రిస్ట్రిక్షన్స్​ పెట్టలేదు. కాకపోతే మళ్లీ బాల్​ తగిలితే సర్జరీ చేయాల్సి వస్తుందని చెప్పారు’ అని ఈ హైదరాబాదీ వ్యాఖ్యానించాడు. 

అంతా టీమ్​ కోసమే..

టీమ్​ కోసం తాను ఎంతవరకైనా పోరాడతానని విహారి చెప్పాడు. ‘నేను ఫస్ట్​ బాల్​కు ఔటైనా ఫర్వాలేదనుకున్నా. కానీ గ్రౌండ్​లోకి అయితే వెళ్లాలనుకున్నా. అన్నింటికంటే టీమ్​ ప్రయోజనాలే ముఖ్యమని నా తోటి ప్లేయర్లకు చూపెట్టాలనుకున్నా. నేను అక్కడ ఉంటే మిగతా పది మంది గెలిచేందుకు కృషి చేస్తారన్నది నా నమ్మకం. కఠినమైన గ్రూప్​ దశను దాటి మేం క్వార్టర్స్​కు చేరాం. కాబట్టి దానిని కొనసాగించాలని అనుకున్నాం. కానీ దురదృష్టవశాత్తూ మేం అనుకున్న ఫలితం రాలేదు’ అని విహారి వెల్లడించాడు. తాను లెఫ్ట్​ హ్యాండ్​ బ్యాటింగ్​ చేయడంతో ఎంపీ టీమ్​లో చాలా మంది ఆశ్చర్యపోయారన్నాడు. గాయమైన రోజు కేవలం పెయిన్​ కిల్లర్​ ట్యాబ్లెట్లు మాత్రమే తీసుకున్నానని చెప్పిన విహారి నిద్ర పట్టలేదన్నాడు. రెండో ఇన్నింగ్స్​లో స్పిన్నర్ల బౌలింగ్​లో ముందుకొచ్చి ఆడింది కేవలం బాల్​ను టచ్​ చేయడం కోసమేనని చెప్పాడు.