హైదరాబాద్, వెలుగు: పొల్యూషన్, చలి తీవ్రత కారణంగా కరోనా వ్యాప్తి పెరిగే ప్రమాదముందని పబ్లిక్ హెల్త్ డైరెక్టర్ డాక్టర్ శ్రీనివాసరావు హెచ్చరించారు. ఈ ఒక్కసారికి పటాకులు కాల్చకుండా దీపావళి పండుగ జరుపుకోవాలని ప్రజలకు విజ్ఞప్తి చేశారు. శుక్రవారం ఆయన హైదరాబాద్ కోఠిలోని తన ఆఫీసులో మీడియాతో మాట్లాడారు. పొల్యూషన్, చలి వల్ల ఢిల్లీలో కరోనా కేసులు పెరిగిన విషయాన్ని ఆయన గుర్తు చేశారు. మన దగ్గర దసరా, బతుకమ్మ సమయంలో ప్రజలు జాగ్రత్తలు తీసుకున్నందున కేసులు పెరగలేదన్నారు. ఇప్పుడు కూడా ఎవరికివారే ఇంట్లోనే పండగ జరుపుకోవాలని కోరారు. టపాసుల పొల్యూషన్తో ఆస్తమా, శ్వాసకోశ జబ్బులు వచ్చే ప్రమాదం ఉందన్నారు. కాలుష్యంతో గాలి బరువుగా మారి ఒకే చోట ఎక్కువ సేపు ఉంటుందని, అప్పుడు కరోనా వ్యాప్తి ఎక్కువగా జరిగే ముప్పు ఉంటుందని చెప్పారు. కాబట్టి ఈ ఒక్కసారికి పటాకులకు దూరంగా ఉంటే మంచిదని ఆయన సూచించారు. ఫిబ్రవరి నాటికి కరోనా వ్యాక్సిన్, పూర్తి స్థాయిలో ట్రీట్మెంట్ అందుబాటులోకి వచ్చే అవకాశముందన్నారు.
